«Խոստումը» թուրքական քաղաքականության և քարոզչության մի դրսևորում է. Կարինե Հակոբյան
<<Խոստումը>> : Երեկ դիտեցի: Գեղարվեստական տեսակետից սիրողականից մի քանի աստիճան ցածր, պարզունակ, բայց միևնույն ժամանակ հակահայկական նպատակներ ունեցող ֆիլմ է: Իրականում ցեզասպանությունը այլ միջոցներով շարունակվում է նաև այսօր. աննկատ՝ ես կասեի բամբակյա գործիքներով, շա՜տ հնարամիտ: Ինչու՞ նեղություն կրել, երբ կարելի է մեզ վերացնել մեր իսկ ձեռքով, մեր ֆինանսներով, մեր գրած հրաշալի երաժշտությամբ, որը ֆիլմում օգտագործվում է, որպեսզի ավելի տպավորիչ լինի Թուրքական կայսրության պանծալի պատկերը առաջին համաշխարհային պատերազմից առաջ, երբ տարբեր ազգային փոքրամասնություններ, ինչպես նշվում է ֆիլմի սկզբում, այդ թվում հայերը, չգիտես որտեղից այնտեղ հայտնված, խաղաղ և երջանիկ ապրում էին թուրքական հողի վրա: Ֆիլմի հեղինակը կարծես ոչինչ չգիտի առաջին համաշխարհայինից շատ առաջ 1894-1896 թվականների ջարդերի մասին, ոչինչ չգիտի Թուրքական կայսրության մեջ գտնվող պատմական Հայաստանի մասին: Ֆիլմն, իհարկե, սիրողականից մի քանի աստիճան ցածր է, բայց դա չի խանգարում, որպեսզի այն լինի ծրագրային: Իրականում այն թուրքական քաղաքականության և քարոզչության մի դրսևորում է: Բայց կարո՞ղ է որևէ մեկը ինձ ասել. ինչու՞ է դա արվում հայերի միջոցներով: Թուրքական տեսանկյունից պարզ է, թե ինչու: Բայց մե՞նք ինչ ենք մտածում: Այդ ֆիլմը էկրաններին հանդուրժելուց հետո ես հասկացա, որ մենք շատ վաղուց արդեն ոչինչ չենք մտածում: Անգամ այնքան չենք մտածում, որ չկա մի կինոքննադատ ոչ Հայաստանում, ոչ համայն աշխարհում, որ գրի, որ այդտեղ նախ ֆիլմ չկա, և երկրորդ կա պատմական փաստերի աղավաղում և քաղաքական քարոզչություն: ֆիլմի դրական հերոսներն են ամերիկացի ժուռնալիստը, Ամերիկայի հրեա դեսպանը, թուրքը, որը գնդակահարվում է ազնիվ արարքի համար և հայերին փրկության եկած Ֆրանսիացին, որը թեև երկու րոպե է երևում, բայց քանի որ Ժան Ռենոն է խաղում, ազդեցությունը մեծ է: Բեմադրիչը անգամ նեղություն չի կրել հայերի մասին ֆիլմում հայկական տիպաժներ օգտագործելու: Իր համար ինչ տարբերություն.բոլորն էլ նույնն են: Խրոխտ քայլվածքով գաղթի դուրս ելած շարասյան մեջ աշխարհի բոլոր ժողովորդներին կարելի է տեսնել. մեքսիկ, հնդիկ, աֆրոամերիկացի, հույն, քուրդ և այլն: Եվ հայության հանդեպ այդպիսի վերաբերմունք ունեցող մարդուն պատվիրում են այդ ֆիլմը: հետաքրքիր է Ինչո՞ւ: Հարցս իհարկե հռետորական է: Կարինե Հակոբյանի գրառումը
Հետևեք մեզ Viber-ում
