Հզոր հակառակորդը՝ հավատարիմ բարեկամից լավ է

ԱՄՆ նախագահ Դոնալդ Թրամփը հայտարարել է, որ, անպայման, կհրավիրի Ռուսաստանի նախագահ Վլադիմիր Պուտինին G7-ի հանդիպմանը, որն ամերիկյան առաջնորդը ցանկանում է անցկացնել նոյեմբերի նախագահական ընտրություններից հետո:

«Մենք մի շարք առաջնորդների ենք հրավիրել հանդիպմանը: Ես, անշուշտ, Պուտինին կհրավիրեի հանդիպմանը: Կարծում եմ, որ նա շատ կարևոր գործոն է: Մենք կհրավիրենք այն ղեկավարներին, որոնք G7-ի անդամ չեն, ոմանք արդեն ընդունել են հրավերները»,- լրագրողներին ասել է Թրամփը:

«Բայց ես կարծում եմ, որ մենք պետք է հանդիպում անցկացնենք ընտրություններից հետո, կարծում եմ, որ ընտրություններից հետո մթնոլորտն ավելի լավը կլինի»,- հավելել է նախագահը:

Ինչպես հայտնի է, ավելի վաղ նախագահ Թրամփը հայտարարել էր, որ G7-ի հանդիպումը հետաձգում է սեպտեմբեր և ցանկանում է ևս չորս երկիր հրավիրել՝ Ռուսաստանին, Հնդկաստանին, Ավստրալիային և Կորեայի Հանրապետությանը: Ըստ նրա` G7-ում Ռուսաստանի ներկայությունը պահանջում է ողջամտություն:

Միևնույն ժամանակ Թրամփը կարծում Է, որ Ռուսաստանն ու Չինաստանը հիացած չեն լինի, եթե ինքը հաղթի ընտրություններում: ԱՄՆ-ի նախագահը պնդում է, որ Ռուսաստանն ու Չինաստանը ցանկանում են իր պարտությունը նոյեմբերին կայանալիք ընտրություններում:

«Չինաստանը շատ խիստ ցանկանում է, որ մենք պարտվենք: Եվ գիտե՞ք, թե էլի ով ուրախ չԷ մեր հաղթանակի համար: Ռուսաստանը», ասել է Միացյալ Նահանգների նախագահն օգոստոսի 10-ին Սպիտակ տանը կայացած մամուլի ասուլիսում։ Թրամփի խոսքով՝ Մոսկվան դժգոհ է, որ իր շնորհիվ ՆԱՏՕ-ին հաջողվել է ավելացնել վճարները կազմակերպության բյուջե: Բացի դրանից, ԱՄՆ-ը, Միացյալ Նահանգների նախագահի կարծիքով՝ դարձել է ավելի ուժեղ ռազմական առումով, ինչպես նաև դարձել է առաջատար Էներգետիկայի ոլորտում: «Ես բացահայտեցի խողովակաշարի շուրջն ահավոր համաձայնագիրը Գերմանիայի և Ռուսաստանի միջև:

Ոչ ոք նույնիսկ չգիտեր «Հյուսիսային հոսք–2» խողովակաշարի գոյության մասին: Ոչ ոք այդ մասին չգիտեր, ոչ ոք այդ մասին չէր խոսում»,- համոզված է Թրամփը: «Այնպես որ Ռուսաստանը գոհ չի լինի, և ես կարող եմ ասել, որ Չինաստանը գոհ չի լինի»,- հավելել է Սպիտակ տան ղեկավարը:

Թրամփը նաև նկատել է, որ ԱՄՆ-ը մեկ ամսվա ընթացքում համաձայնության կհասնի Իրանի հետ իր վերընտրման դեպքում: «Եթե նոյեմբերի 3-ին մենք շահենք, մենք Իրանի հետ գործարք կկնքենք մեկ ամիս անց: (…) Չինաստանը ցանկանում է, որ մենք տանուլ տանք: Դարձյալ ո՞վ է ցանկանում մեր պարտությունը: Ռուսաստանը»,- պնդել է Թրամփը:
Թրամփը, կարծես՝ հզոր թշնամին, վատ բարեկամից լավն է սկզբունքով է առաջնորդվում՝ Ռուսաստանի հետ հարաբերությունները գնահատելիս: Միևնույն ժամանակ Ռուսաստանին գնահատելով որպես հզոր հակառակորդ, նա՝ գնահատում է Ռուսաստանի կարևորությունը:

Օրերս նաև Գերմանիայի արտգործնախարարը կարևորեց Ռուսաստանի հետ հարաբերությունները: Գերմանիայի արտգործնախարար Հեյկո Մաասը հայտնեց, որ մեկնում է Ռուսաստան` երկու երկրների միջև հարաբերությունների տարբերությունների մասին բաց խոսելու համար:

Մաասը հիշեցրել է, որ Ռուսաստանի և Գերմանիայի միջև հարաբերությունները փորձությունների ենթարկվեցին անցյալ տարի, ընդ որում` «ոչ վերջին հերթին Բեռլինի Թիրգարտենի այգում սպանության (Վրաստանի քաղաքացու) պատճառով»: «Գերմանա-ռուսական հարաբերությունները չափազանց կարևոր են` դրանք ինքնահոսի թողնելու համար»,- շեշտել է Մաասը` նշելով, որ միայն Մոսկվայի մասնակցությամբ կարելի է արդյունքների հասնել այնպիսի կարևոր թեմաների շուրջ, ինչպիսին է Ուկրաինայի, Լիբիայի և Սիրիայի հակամարտությունների կարգավորումը: «Եվ զենքի վերահսկման ոլորտում Ռուսաստանի քայլերը ևս առանցքային դեր ունեն»,- ասել է գերմանացի նախարարը:

Նա հավելել է, որ Ուկրաինայում, Լիբիայում և Սիրիայում հակամարտությունների լուծման հարցում կարելի է արդյունքների հասնել միայն Ռուսաստանի մասնակցությամբ:
Միևնույն ժամանակ Մաասը ռուսաստանյան այցի շրջանակներում հայտարարեց, որ ոչ մի երկիր իրավունք չունի ԵՄ-ին թելադրել իր էներգաքաղաքականություն:

Գերմանիան վստահ է, որ իր սուվերեն իրավունքն է որոշել, թե որտեղից է էներգիա ստանում, և ոչ մի երկիր իրավունք չունի միջամտել այդ հարցին: Այս մասին Ռուսաստանի ԱԳ նախարար Սերգեյ Լավրովի հետ հանդիպմանը հայտարարել է Գերմանիայի արտաքին գործերի նախարար Հայկո Մաասը՝ մեկնաբանելով «Հյուսիսային հոսք-2» գազամուղի կառուցումն ավարտին հասցնելու հարցով ծրագրերի հետ կապված իրավիճակը, հաղորդում է DW-ը: «Ոչ մի երկիր իրավունք չունի ԵՄ-ին թելադրել իր էներգաքաղաքականությունը: Պատժամիջոցներն, անկասկած, սխալ ճանապարհ է»,-ասել է Մաասը՝ նկատի ունենալով գազամուղի կառուցման գործում ներգրավված ընկերությունների նկատմամբ ԱՄՆ սահմանափակող միջոցները:

Մաասը նշել է, որ Գերմանիան կշարունակի առաջ տանել եվրոպական ինքնիշխանության կարևորությունը: Իր հերթին, Լավրովը կարծիք է հայտնել, որ «Հյուսիսային հոսք-2» գազամուղի կառուցումը կհաջողվի ավարտին հասցնել:

««Հյուսիսային հոսք-2»-ի մասնակիցները, ներառյալ՝ ռուսական, գերմանական և այլ ընկերություններ, տրամադրված են, որ նախագիծն ավարտին հասցվի: Կան հիմքեր կարծելու, որ դա կարվի մոտ ժամանակներս»,-ասել է Լավրովը՝ անընդունելի անվանելով էքստերիտորիալ պատժամիջոցները:

Նա նաև բարձր է գնահատել Գերմանիայի մոտեցումը՝ այն սկզբունքային անվանելով: Լավրովը հավելել է, որ նախագիծը կարող է դիվերսիֆիկացնել բնական գազի մատակարարումների երթուղիներն ու ամրապնդել Եվրոպայի էներգետիկ անվտանգությունը: 

Մետաքսյա Շալունց