Հուլիսյան պարտությունն ու Ադրբեջանի Պնախարարի ու ԱԳ նախարարի այցը Թուրքիա. ինչ սպասել

Ադրբեջանի նորանշանակ արտգործնախարար Ջեյհուն Բայրամովը մեկնել է Անկարա։ Սա Բայրամովի առաջին պաշտոնական այցն է արտգործնախարարի պաշտոնում, որի ընթացքում, ըստ պաշտոնական հաղորդագրության, նախատեսված են հանդիպումներ Թուրքիայի բարձրաստիճան ղեկավարության հետ։

Հիշեցնենք՝ նախօրեին Ալիևը հրապարակավ խիստ քննադատության էր ենթարկել Մամեդյարովին:

47-ամյա Բայրամովը պաշտոնը ստանձնել է մեկ ամիս առաջ, երբ նախագահ Ալիևը պաշտոնանկ արեց երկրի երկարամյա արտգործնախարար Էլմար Մամեդյարովին։ Մինչ նշանակումը Բայրամովը զբաղեցնում էր Ադրբեջանի կրթության նախարարի պաշտոնը, ավելի վաղ աշխատել էր հարկային համակարգում, սակայն դիվանագիտական աշխատանքով երբևէ չէր զբաղվել։

Հուլիսի կեսերին՝ Տավուշի մարզում հայ-ադրբեջանական սահմանային ռազմական գործողություններից հետո հանկարծակի Ալիևը հրապարակավ քննադատեց ԱԳ նախարար Էլմար Մամեդյարովին:

Նա հայտարարեց, որ հուլիսի 12-ին բոլոր նախարարները եղել են աշխատասենյակներում, բացի Մամեդյարովից։ «Ես չկարողացա գտնել նրան, նա աշխատասենյակում չէր», - դժգոհել է Ալիևը՝ Մամեդյարովին մեղադրելով անպատասխանատվության մեջ: Արձագանքելով նախագահի հայտարարությանը՝ վարչապետ Ալի Ասադովը հայտնել է, որ Մամեդյարովը այդ օրը՝ ժամը 3-ին տանն էր։
«Ես նրան հարցրեցի՝ ինչո՞ւ եք տանը, պետք է աշխատասենյակում լինեք և կատարեք նախագահի հանձնարարությունները»,- պատմել է վարչապետը: Ի պատասխան Իլհամ Ալիևը ասել է, որ «Էլմար Մամեդյարովը հայկական կողմի հետ քննարկում էր կորոնավիրուսի պայքարի հարցով համագործակցությանը վերաբերող հարցեր»։ «Հայաստանի հետ ի՞նչ համագործակցության մասին է խոսքը», - եզրափակել է Ադրբեջանի նախագահը:

Նկատենք, որ ադրբեջանական մի շարք լրատվամիջոցներ հուլիսից դեռ մի քանի ամիս առաջ չէին բացառում Մամեդյարովի հրաժարականը: 60-ամյա Մամեդյարովը վերջերս կոռուպցիոն սկանդալի կենտրոնում էր հայտնվել ինչպես իր ղեկավարած կառույցում, այնպես էլ որդու անվան հետ կապվող աղմկահարույց պատմությունների պատճառով:
Ինչևէ, Թուրքիայի արտգործնախարար Մևլութ Չավուշօղլուն իր ադրբեջանցի գործընկեր Ջեյհուն Բայրամովի հետ համատեղ մամուլի ասուլիսում անդրադարձել է Ղարաբաղյան հակամարտությանը` քննադատելով ԵԱՀԿ Մինսկի խմբի համանախագահների աշխատանքը:

Ըստ ԱՊԱ գործակալության՝ Թուրքիայի արտգործնախարարն ասել է. «Չնայած միջազգային կառույցների` Լեռնային Ղարաբաղի հակամարտության կարգավորմանն ուղղված որոշումներին, հակամարտությունը լուծում չի գտնում: ԵԱՀԿ Մինսկի խմբի համանախագահներն անկեղծ ջանքեր չեն ներդնում հակամարտության կարգավորման համար»:

Արդեն հայտնի է, որ Թուրքիայի նախագահ Էրդողանն Անկարայում ընդունել է Ադրբեջանի նորանշանակ արտգործնախարարին և Ադրբեջանի պաշտպանության նախարար Զաքիր Հասանովին: Ըստ «Անադոլու» գործակալության հանդիպումը տևել է 45 րոպե, սակայն հանդիպման մանրամասները հայտնի չեն:

Կասկած չկա, որ քննարկվել են Թուրքիայի և Ադրբեջանի միջև ռազմական համագործակցության ուղիները՝ հայ-ադրբեջանական սահմանին լարվածության ֆոնին, ինչպես նաև՝ Թուրքիայի կողմից Ադրբեջանին ռազմատեխնիկական և ռազմական աջակցության հարցերը:

Այսպիսով, Ադրբեջանի նորանշանակ արտգործնախարար Ջեյհուն Բայրամովի առաջին պաշտոնական այցը Թուրքիա՝ նշանավորվեց ԵԱՀԿ Մինսկի խմբի ուղղությամբ թուրք-ադրբեջանական քննադատությամբ:

Անկարան ու Բաքուն կրկին ԵԱՀԿ Մինսկի խմբից «անկեղծ» ջանքեր են ակնկալում:

Անկարան՝ Ադրբեջանի ԱԳ նախարարին, այսպիսով, վարժեցնում է ընդդեմ ԵԱՀԿ Մինսկի խմբի գործունեության աշխատանքին:

Մետաքսյա Շալունց