Լարվածությունն աճում է

Ռուսաստանի եւ Թուրքիայի միջեւ լարվածությունը նոր գագաթնակետի է հասել, գրում է Financial Times-ը: Երկու երկրներն ակտիվացնում են Սիրիայում ռազմական գործողությունները` հակամարտ կողմերին աջակցելով եւ Սիրիական հակամարտությունումմոտենալով ուղղակի առճակատման, որում գնալով ավելի շատ միջազգային ուժեր են ներգրավվում: Պարբերականը նշում է, որ երկու երկրի միջեւ հարաբերությունները կտրուկ վատացել էին նոյեմբերյան միջադեպից հետո, երբ թուրք զինվորականները Սիրիայի հետ սահմանին կործանիչ-ռմբակոծիչ էին խոցել: Սակայն հակասությունները գնալով սրվում են, ինչն արեւմտյան քաղաքական գործիչների շրջանում տագնապ է առաջացնում: Լարվածության վերջին առիթը Սիրիայում քուրդ աշխարհազորայինների ջոկատներն էին, որոնց աջակցում են Ռուսաստանը եւ ԱՄՆ-ը, ինչպես նաեւ արեւմտյան այլ երկրներ, եւ որոնց Թուրքիան ահաբեկիչներ է համարում, տեղեկացնում է  Gazeta-ն: Ինչպես գրում է պարբերականը, Հալեպի նահանգում ի հայտ եկած քաոսի մթնոլորտի շնորհիվ քրդերին հաջողվել է գրավել բնակավայրեր, որոնք գտնվում էին Թուրքիայի եւ Պարսից ծոցի երկրների աջակցությունը վայելող ապստամբների վերահսկողության տակ: Անկարան իր հերթին անցյալ հանգստյան օրերին սկսել էր հրետանուց գնդակոծել քրդական աշխարհազորայիններին, երբ նրանք առաջացելէին դեպի թուրքական սահման: Երկուշաբթի թուրքական զորքը շարունակեց հրետակոծությունը: Թուրքիայի վարչապետ Ահմեդ Դավութօղլուն քրդերին մեղադրել է նրա համար, որ նրանք   «Սիրիայում Ռուսաստանի գործիքն են», եւ սպառնացել է  շարունակել գրոհները քուրդ աշխարհազորայինների դեմ: Նա հայտնել է, որ Թուրքիան կոչնչացնի Մենաղ ավիաբազան, եթե սիրիական քրդերը չհեռանան այնտեղից եւ խոստացել է քրդական կազմավորումներից պաշտպանել սիրիական Աազազ քաղաքը: Նշվում է, որ Մոսկվան իր հերթին Անկարային մեղադրել է նրա համար, որ վերջինս գրոհայիններին թույլ է տալիս իր տարածքով Սիրիա մտնել, որտեղ նրանք անդամակցում են  «Իսլամական պետությանը» եւ «Ալ-Կաիդայի» հետ կապված խմբավորումների, ինչպես նաեւ վիրավոր ջիհադականներին թույլ է տալիս վերադառնալ Թուրքիա: Թուրքիան համառորեն հերքում է այդ մեղադրանքները: