ՀՀԿ-ի համար ձայն բերողին բարձր պաշտոն տվեցին

Վարչապետի որոշմամբ Աշոտ Զաքարյանը նշանակվեց ՀՀ ՊՆ ռազմական ոստիկանության պետ:
Հիշեցնենք, որ Աշոտ Զաքարյանը 10 տարի շարունակ՝ 1993-2003 թվականները, զբաղեցրել է Գյումրու ռազմական ոստիկանության պետի պաշտոնը, նա Արցախյան պատերազմի մասնակից է, եղել է «Կումայրի» ջոկատի հրամանատարը: 2008 թվականի նախագահական ընտրությունների ժամանակ նա պաշտպանել է առաջին նախագահ Լևոն Տեր-Պետրոսյանի թեկնածությունը, եղել է «Մարտի 1-ի» գործով քաղբանտարկյալ։ Զաքարյանը եղել է Գյումրու ՀԱԿ կառույցի պատասխանատուն, որից հրաժարվեց այն պատճառով, որ ՀԱԿ-ը սկսեց համագործակցել ԲՀԿ-ի հետ: Ավելի ուշ մամուլում լուրեր տարածվեցին, թե այն ժամանակա իշխանություններն էին նրան պոկել ՀԱԿ-ից՝ խոստանալով բարձր պաշտոն:

Լուրերը թերեւս հաստատվեցին, 2015-ին Զաքարյանը Ռազմական ոստիկանության Սիսիանի կայազորի պետ նշանակվեց: Ավելին՝ 2017 թվականի խորհրդարանական ընտրություններին, ըստ գյումրեցիների դուրս չէր գալիս ՀՀԿ-ի կողմից ռեյտինգային թեկնածու առաջադրված Ֆելիքս Ցոլակյանի շտաբից եւ աշխատել է ՀՀԿ-ի թեկնածուի համար:

Աշոտ Զաքարյանը մինչ ռազական ոստիկանության պետ նշանակվելը զբաղեցնում էր Վանաձորի ռազմական ոստիկանության պետի պաշտոնը: 2008 թվականի քաղաքական իրադարձություններով պայմանավորված՝ նրան անձամբ ճանաչում է նաև վարչապետ Նիկոլ Փաշինյանը: Նա ջերմ հարաբերություններ ուներ նաև գեներալ, ԵԿՄ նախկին ղեկավար Մանվել Գրիգորյանի հետ:

Իսկ հեղափոխությունից հետո առավել ջերմ հարաբերություններ է հաստատել Սասուն Միքայելյանի եւ Անդրանիկ Քոչարյանի հետ: Զաքարյանի անցյալի, նախկինների, հատկապես ոստիկանապետ Վովա Գասպարյանի հետ սերտ հարաբերությունների մասին մամուլում բազում անդրադարձեր են եղել:

Բայց քանի որ իշխանությունում կադրային սով է, ապա Նիկոլ Փաշինյանին այլ բան չի մնում, քան ընտրություն կատարել իր կողմից այդքան դատափետվող նախկինների դաշտից: Իհարկե, մենք կողմ չենք նախկինների հետ կապվող ցանկացած բան, ցանկացած մեկին մերժելու փակուղային մոտեցմանը, բայց գոնե կարելի է ընտրել հնարավորինս չվարկաբեկված, ճանապարհ անցած մարդկանց, այլ ոչ թե կիսաՀԱԿականի, կիսաՀՀԿա-ականի:

Անի Սահակյան