Մոսկվայի հզոր պատասխանը. Թուրք-ադրբեջանական զորավարժությունները դեռ «շատ ջուր կտանեն»

Ռուսաստանյան մասնագիտացված avia.pro կայքը երեկ սենսացիոն տեղեկություն հայտնեց, թե իբր թուրքական F-16 կործանիչները Հայաստանի մայրաքաղաքին են մոտեցել այն աստիճանի, որ կարող էին հնարավորություն ունենալ օդային հարված հասցնել։ Այս տեղեկությունը վերահրապարակել էր նաև ռուսաստանյան Lenta.ru-ն։

«Ոչ պակաս, քան երկու մարտական մեքենաներ մաքսիմալ մոտեցել են Հայաստանի սահմանին ու հետ գնացել, երբ մինչև Երևան հեռավորությունը կազմել է 56 կմ»։ Ըստ սկզբնաղբյուրի` դրանով իսկ նրանք կարող էին մշակել Հայաստանի մայրաքաղաքին հարված հասցնելու ծրագիրը։ «Նման մանեվրը թույլ է տալիս հարված հասցնել այնպիսի զինատեսակներից, որոնցով հագեցած են թուրքական ռազմաօդային ուժերը։ Դրանից հետո Հայաստանի սահմանի մոտ նկատվել են Ադրբեջանի և Թուրքիայի ռազմաօդային ուժերի ուղղաթիռները», ասվում էր տեղեկատվությունում։

Հուլիսի 29-ից, հիշեցնենք, որ մեկնարկել են թուրք-ադրբեջանական լայնածավալ զորավարժություններ, որոնք կշարունակվեն մինչև օգոստոսի 10-ը։

ՀՀ պաշտպանության նախարարության մամլո խոսնակ Շուշան Ստեփանյանն անդրադառնալով ռուսական պարբերականի տեղեկությանը՝ հայտնել է. «Ինչ վերաբերում է օդային իրադրությանը, ապա շրջանառվող տեղեկությունը իրականությանը չի համապատասխանում»: Իսկ ՊՆ-ն այսօր պաշտոնապես հայտարարել է հետևյալը. «ՀՀ զինված ուժերի ստորաբաժանումներն ամբողջությամբ վերահսկում են օպերատիվ իրավիճակը հայ-ադրբեջանական սահմանագոտու ամբողջ երկայնքով»:

Ակնհայտ է, որ թուրք-ադրբեջանական զորավարժություններն ուղեկցվում են կեղծ և ակնհայտորեն չափազանցված տեղեկություններով: Եվ փաստորեն դրանցից անմասն չեն մնում ռուսական կայքերը:

Դա նշանակում է, որ Թուրքիան ու Ադրբեջանը ստիպված են գոնե նման ձևով զորավարժությունների համար ապահովել լրջության ֆոն:

Սակայն, զգոնությունը պետք է կորցնել ոչ մի պարագայում, որովհետև զորավարժությունները չեն նվազեցնում ոչ ռազմական սպառնալիքներն, ոչ էլ սադրանքների կազմակերպում թե՛ հայ-ադրբեջանական սահմանին, թե՛ Արցախ-Ադրբեջան շփման գծում:

Ռուսաստանն ակնհայտորեն այս զորավարժությունների փաստը, ըստ արժանվույն գնահատեց...

Հակադարձման տեսանկյունից Ռուսաստանի պատասխան-քայլերը բավական ուշագրավ էին:

Ռուսաստանը զորավարժություններ է սկսել Հայաստանում, Վոլգոգրադում և Ռոստովում: Ինչպես հաղորդում է Ռուսաստանի պաշտպանության նախարարության կայքը, մասշտաբային զորավարժություններին մասնակցում է շուրջ 4000 ռուս զինծառայող:
Պաշտոնական հաղորդագրության համաձայն՝ Հայաստանում տանկային ստորաբաժանումները մարտական հրաձգություն են անցկացրել պայմանական թիրախների ուղղությամբ, որոնք տեղակայված են մինչև 4000 մետր հեռավորության վրա:

Իսկ ավելի վաղ ուսումնական ահազանգով գործի են դրվել Հարավային ռազմական օկրուգի 8-րդ համազորային բանակի զորամասերը, որոնք տեղակայված են Վոլգոգրադում և Ռոստովում: Գումարտակային տակտիկական խմբերն ուղարկվել են Պրուդբոյ համազորային պոլիգոններ:

Հավելենք, որ Ռուսաստանը զորավարժություններ է անցկացնում Հյուսիսային և Հարավային Կովկասի հինգ տարածաշրջանում՝ Դաղստանում, Հյուսիսային Օսեթիայում, Չեչնիայում, ինչպես նաև Աբխազիայում և Հարավային Օսիայում:

Իրականում, Ռուսաստանը մասշտաբային պատասխանեց թուրք-ադրբեջանական քարոզչա-ռազմավարական նպատակներին՝ հուլիսյան սադրանքներից հետո ցույց տալ «հզոր եղբայրության» ուժը:

Մետաքսյա Շալունց