Աննա Վարդապետյանը «բոլոլա» է սարքել Նիկոլ Փաշինյանի եւ իշխանության գլխին

Կառավարության առաջադրած Սահմանադրական դատարանի թեկնածուի շուրջ աղմուկը չի դադարում: Իշխանության տունը նույնիսկ կռիվ է ընկել այս առաջադրումից: Անցած շաբաթ կառավարության նիստում վարչապետը ներկայացրեց ՍԴ իրենց թեկնածու Վահրամ Ավետիսյանին, ավելի ուշ պարզ դարձավ, որ երիտասարդ իրավաբանը ոչ այլ ոք է, քան Սերժ Սարգսյանի կամակատար Դավիթ Ավետիսյանի որդին: Վերջինս 2008-ի հունվարից վճռաբեկ դատարանի քրեական պալատի նախագահն էր, նրա ձեռքի տակով էին անցնում քրեական բոլոր գործերը, աղմկահարույց դատավճիռներ կայացնում:

Վահրամ Ավետիսյանն ինչպե՞ս է հայտնվել Նիկոլ Փաշինյանի տեսադաշտում, եւ ինչու են որոշել նրան ներկայացնել որպես Սահմանադրական դատարանի դատավորի թեկնածու, քանզի մինչ այդ տարբեր անուններ էին շրջանառվում, որոնց թվում նրա անունը չկար։ <<Հրապարակ>>-ի տեղեկություններով, նրա թեկնածությունն արդարադատության նախկին փոխնախարար, այժմ վարչապետի օգնական Աննա Վարդապետյանն է առաջադրել: Մենք օրերս անդրադարձել էինք այս օգնականին՝ գրելով, որ Վարդապետյանը զբաղված է վարչապետի հրահանգները մինչեւ դատական համակարգ իջեցնելով եւ համակարգի կուրացիայով: Վարդապետյանը երկար տարիներ եղել է Վահրամ Ավետիսյանի հոր՝ Դավիթ Ավետիսյանի օգնականը։

Նա վճռաբեկում աշխատանքի է անցել 2007 թվականին՝ եղել է իրավական փորձաքննությունների վարչության կրտսեր մասնագետ, 1 տարի անց՝ արդեն ավագ մասնագետ, ապա՝ 2009 թվականի մարտից, 23-ամյա աղջիկը նշանակվել է վճռաբեկ դատարանի քրեական պալատի նախագահ Դավիթ Ավետիսյանի ավագ օգնական, հետո՝ խորհրդական։

2014-ին նշանակվել է դատական դեպարտամենտի ղեկավարի առաջին տեղակալ։ Ի դեպ, այստեղ ուշագրավ է նաեւ այն փաստը, թե ինչպես է Նիկոլ Փաշինյանն իր օգնական վերցրել մի մարդու, ում օգնությամբ է Դավիթ Ավետիսյանը կազմել 2008 թվականի մարտիմեկյան գործերը եւ քաղբանտարկյալների, այդ թվում Նիկոլ Փաշինյանի դատավճիռը: Կամ Փաշինյանը աղջնակին որպես ինֆորմացիոն աղբյուր է իր մոտ պահում՝ պարզելու, թե ժամանակին ով, ինչ հրահանգ է տվել, ով ինչպիսի մասնակցություն է ունեցել, կամ էլ իր ղեկավարած իրավապահ համակարգում այնքան անգրագետ կադրեր են, որ մարտիմեկյան գործերով չեն կարողանում նորմալ գործեր կարել, Փաշինյանն էլ մնացել է Աննա Վարդապետյանի հույսին:

Վերադառնալով ՍԴ թեկնածուի եւ նա շուրջ չմարող աղմուկին: Արդեն նաեւ տեղեկություներ կան, որ Իմ Քայլում նույնպես պրետենզիաներ ունեն թեկնածուի հարցում, եւ շատ հնարավոր է, որ ՍԴ թեկնածուի ընտրությունը ձախողվի, նրան չգործուղեն ՍԴ:

Իմ Քայլի ներքին քննարկումների ժամանակ կարծիքներ են հնչել, որ ՍԴ դատավորի թեկնածուն պետք է առնվազն խոցելի անցյալ չունենա անգամ ընտանիքի հարցում, քանի որ իրենք առանց այն էլ հակաօրինական գործընթացի միջով են անցել եւ այդ ամենից հետո առնվազն չեզոք թեկնածու պետք է ներկայացնել: Եթե Հրայր Թովմասյանն ու մյուս դատավորները, ըստ իրենց, սպասարկել են նախկիններին, ու հիմա էլ հավատ չեն ներշնչում հանրության մոտ, ապա նույնն արել է թեկնածուի հայրը եւ չկա որեւէ երաշխիք, որ նոր Հայաստանում էլ նույն անձը եւ իր որդին չեն գործի Սերժ Սարգսյանի ազդեցության ներքո:

Իմ Քայլում կարծում են, որ Աննա Վարդապետյանը սարքել է ոչ միայն վարչապետի, այլեւ ողջ իշխանության գլխին:

Անի Սահակյան