Նիկոլ Փաշինյանի դուխը և լեհական ուսանելի փորձը

Լեհաստանի կառավարությունը հայտնել է, որ դուրս է գալիս «Կանանց նկատմամբ և ընտանեկան բռնության կանխարգելման ու դրա դեմ պայքարի կոնվենցիայից։ Խոսքը Ստամբուլյան կոնվենցիայի մասին է։ Կոնվենցիայից դուրս գալ առաջարկել է Պահպանողական «Օրենք եւ արդարություն» կուսակցությունը՝ Յարոսլավ Կաչինսկու նախագահությամբ:

Ինչպես գրում է Euronews-ը, Ստամբուլյան կոնվենցիան աշխարհում առաջին պարտադիր կոնվենցիան է՝ կանանց նկատմամբ բռնությունները կանխելու համար, բայց Լեհաստանի արդարադատության նախարար Զբիգնև Զիոբրոն կոնվենցիայի տեքստը որակել է հասարակության համար «կործանարար», քանի որ այն պահանջում է դպրոցների ուսումնական ծրագրում ներառել դասաժամեր՝ երեխաներին սովորեցնելու գենդերի մասին։ Ըստ Զիոբրոյի` կոնվենցիայի հոդվածները, որոնք վերաբերում են երեխաների և երիտասարդների կրթությանը, ինչպես նաև ԼԳԲՏ համատեքստում ընտանեկան հարաբերություններին, ընդունելի չեն:
«Մենք նաև մերժում ենք ընտանեկան հարաբերությունների խթանման ԼԳԲՏ տարրը՝ տեսակետ, որը քարոզում են ձախ կամ միասեռական շրջանակների ակտիվիստները, որոնք ցանկանում են իրենց համոզմունքները վերածել պարտադիր օրենքի»,- ասել է նա: Նախարարի խոսքերով` փաստաթուղթը խախտում է ծնողների իրավունքները և պարունակում է «գաղափարական բնույթի տարրեր»: Նա կոնվենցիան անվանել է «ֆեմինիստական արարողություն՝ միասեռական գաղափարախոսությունը արդարացնելու համար»:
Ըստ ԲիԲիՍի-ի հոդվածի՝ իշխող «Օրենք և Արդարություն» կուսակցությունը և նրա կոալիցիոն գործընկերները սերտորեն կապված են Կաթոլիկ եկեղեցու հետ, և  կառավարությունը խոստացել է առաջ տանել ավանդական ընտանեկան արժեքների ամրապնդումը:
Լեհաստանի նախագահ Անջեյ Դուդան էլ, որ վերընտրվել էր այս ամսվա սկզբին՝ քարոզարշավի ընթացքում ԼԳԲՏ համայնքի իրավունքների խթանումը բնորոշել էր՝ իբրև «գաղափարախոսություն», որն ավելի կործանարար է, քան կոմունիզմը:
Լեհաստանի Արդարադատության նախարարը հայտարարել է, որ վերջին տարիներին երկրում իրականացված բարեփոխումներն ավելի լավ են  պաշտպանում կանանց` նրանց դեմ իրականացվող բռնությունից, քան այս կոնվենցիան:

Լեհաստանի կառավարությունը կոնվենցիայից դուրս գալու գործընթացը սկսել է այս երկուշաբթի օրվանից: Բազմաթիվ մարդիկ, հիմնականում կանայք, նախորդ ուրբաթ օրը դուրս էին եկել մայրաքաղաք Վարշավայի փողոցներ՝ Ստամբուլյան կոնվենցիայից դուրս գալու դեմ բողոքի ակցիայի:
«Սրա նպատակն ընտանեկան բռնության օրինականացումն է»,- «Ռոյթերս» գործակալությանն ասել էր քաղաքում երթի կազմակերպիչներից մեկը:

Եվրախորհուրդը անհանգստացած է Լեհաստանի՝ Կանանց նկատմամբ բռնության դեմ պայքարի կոնվենցիայից դուրս գալու մասին հայտարարության կապակցությամբ: Այս մասին հուլիսի 26-ին ասել է ԵԽ գլխավոր քարտուղար Մարիա Պեյչինովիչ-Բուրիչը: Նա այդ քայլը որակել է «հսկայական ձախողում»՝ կանանց բռնություններից պաշտպանության հարցում: Ես աջակցում եմ Լեհաստանի այն քաղաքացիներին, ովքեր դուրս են գալիս փողոց՝ հարգելով կանանց իրավունքները»,- գրել է իսպանացի պատգամավոր Եվրասիա Գարսիա-Պերեսը Twitter- ում:
Կոնվենցիան Լեհաստանի կառավարության կողմից ստորագրվել է 2012 թվականին եւ վավերացվել 2015-ին: Նշենք, որ կոնվենցիան Եվրոպայի Խորհրդի բոլոր 47 անդամ պետությունների կողմից վավերացվել է: Այն դարձել է եվրոպական առաջին համաձայնագիրը, որն ուղղված է կանանց եւ ընտանեկան բռնության դեմ պայքարին, սակայն պարունակում է պահանջներ՝ միասեռականների իրավունքների ընդլայնման և տարածման և ուսուցման վերաբերյալ: Կոնվենցիան վավերացրել եւ ստորագրել է 34 պետություն, եւս 11-ը ստորագրել են, բայց չեն վավերացրել: Հայաստանը այս կոնվենցիային միացել էր 2012 թվականին, սակայն չէր վավերացրել մինչև 2019 թվականը։ Անցյալ տարի, չնայած հանրային լուրջ քննադատություններին և ընդգծված դիմադրությանը, Նիկոլ Փաշինյանի կառավարությունն ու Ազգային ժողովը վավերացրեցին այս խայտառակ փաստաթուղթը։ Հիմնական պատճառաբանությունը ստանձնած միջազգային պարտավորությունների կատարումն էր։ Կյանքը, սակայն, ցույց է տալիս, որ չվավերացնելու համար ընդամենը քաղաքական կամք էր պետք։ Լեհաստանի փորձը գալիս է ապացուցելու, որ մենք կարող ենք հրաժարվել ստամբուլյան կոնվենցիայից նաև այժմ․ փաստորեն, երբեք ուշ չէ : Այսպիսով՝ ճիշտ ժամանակն է, որ դուխով վարչապետը քայլ անի՝ հրաժարվի Ստամբուլյան խայտառակ կոնվենցիայից։

Հայկ Դավթյան