Մենք ոչ մեկին ոչ նաղդով, ոչ նիսյայով ընտրակաշառք չենք խոստացել. ՀՀԿ
«Ելք» դաշինքի կողմից ՀՀԿ-ի մասին արված հայտարարությունները իրականությանը չեն համապատասխանում, ՀՀԿ Գործադիր մարմնի նիստից հետո լրագրողների հետ զրույցում ասաց ՀՀԿ մամուլի խոսնակ, ՀՀԿ շտաբի պետ Էդուարդ Շարմազանովը։ Ինչպես ասաց՝ կուսակցությունը դրական է գնահատում Տարոն Մարգարյանի քարոզչությունն ու դրա արդյունքները այս 22 օրերին։ «Կարողացանք մեր ծրագրերը ներկայացնենք ընտրողներին։ Հույս ունենք, որ ընտրությունները կանցնեն հանգիստ, հանդարտ, ժողովրդավարական մթնոլորտում»,- ասել է Շարմազանովը։ Դիտարկմանը, թե «Ելք» դաշինքը եւ Նիկոլ Փաշինյանը բազմաթիվ ահազանգեր են ներկայացրել ընտակաշառք բաժանելու մասին, Շարմազանովը պատասխանել է. «Դա իրականությանը չի համապատասխանում։ Ընտրակաշառքների վերաբերյալ կարծիքը կեղծ ահազանգ է։ Բոլոր մեղադրանքները մերկապարանոց են, անձամբ ես եմ խնդրել, որ այսօր ՀՀԿ նախընտրական շտաբի պետ Հրայր Անտոնյանն ընդունի Նիկոլ Փաշինյանին, կարծելով, որ նա կունենա պատգամավորին հարիր պահվածք, չնայած ՀՀԿ-ի շտաբերում պարտավոր չեն չսպասված հյուրերի դիմավորել: Մենք ոչ մեկին ոչ նաղդով, ոչ նիսյայով ընտրակաշառք չենք խոստացել»։
Հետևեք մեզ Viber-ում
