Նիկոլի զվարճասերները․ իշխանությունն անցողիկ է, բախտը՝ քամի
«Իմ քայլ»-ի պատգամավոր Հայկ Սարգսյանը Սևանի ափին խրախճանք է կազմակերպել՝ խախտելով պարետատան սահմանած բոլոր կանոնները։ Նա եղել է առանց դիմակի, չի պահպանել սոցիալական հեռավորությունը, հավաքույթը եղել է բազմամարդ, տեղի է ունեցել համերգ, որը ծաղկեցրել է երգիչ Գոռ Սուջյանը։
Համացանցում հայտնված տեսանյութից երևում է, որ Հայկ Սարգսյանը կարգին տժժում է, նաև կան կադրեր, որից երևում է, որ պատգամավորը նստել է մենեջերի համակարգչի մոտ և ինչ-որ բաներ է նայում։ Համառորեն լուրեր են շրջում, թե լճի ափին վերջերս կառուցված «Սպիտակ Շորժա» հանգստյան գոտին, որտեղ տեղի է ունեցել խնջույքը, իրականում պատկանում է պատգամավոր Հայկ Սարգսյանին․ նա ոչ միայն օբյեկտի տերն է, այլև անձամբ զբաղվում է կառավարմամբ, ինչի իրավունքը որպես պատգամավոր չունի։
ԱԺ «Իմ քայլը» խմբակցության ղեկավար Լիլիթ Մակունցը, անդրադառնալով իրենց խմբակցության պատգամավոր Հայկ Սարգսյանի՝ Սևանում կազմակերպված փարթիին, հայտարարել է, թե հեռախոսազրույց է ունեցել Հայկ Սարգսյանի հետ՝ մամուլում շրջանառվող լուսանկարների և տեսանյութի առնչությամբ։ «Նա ինձ տեղեկացրեց, որ որևէ միջոցառում չի կազմակերպել, մի քանի օրով գտնվում է հանգստյան գոտում, որտեղ հանգստանում են նաև այլ քաղաքացիներ։ Նա նաև տեղեկացրեց, որ անզգուշություն է թույլ տվել՝ գտնվելով այդ վայրում, որը եղել է մարդաշատ՝ եղել է առանց դիմակի։ Հայկ Սարգսյանը հայցում էր «Իմ քայլը» խմբակցության ներողամտությունը, որ անզգուշություն է թույլ տվել և այդ պահին դիմակ չի կրել։ Որքանով տեղյակ եմ, նա իր գործողությունների համար պետք է արդեն տուգանված լինի՝ անկախ նրանից, որ դա եղել է անզգուշություն»,- նշել է Լիլիթ Մակունցը։
Հարցին՝ Հայկ Սարգսյանը որևէ կապ ունի՞ այդ հանգստյան գոտու հետ, և արդյո՞ք պատգամավորական մանդատից զրկելու հարց կդրվի, Լիլիթ Մակունցը պատասխանեց, որ հանգստյան գոտու հետ առնչություն ունենալու վերաբերյալ հարցը կարող են նաև իրեն ուղղել, սակայն նրա հետ ունեցած խոսակցության ժամանակ պատգամավորն ասել է, որ առնչություն չունի թե՛ հանգստյան գոտու, թե՛ միջոցառում կազմակերպելու հետ։
«Ինչ վերաբերում է պատասխանատվությանը, ապա պարետատան պահանջներին համապատասխան, ամբողջ խստությամբ, եթե անգամ դա անզգուշություն է եղել, ապա այդ պատժամիջոցները կկիրառվեն նաև Հայկ Սարգսյանի նկատմամբ։ Խոսքն այն մասին է, որ ՀՀ քաղաքացին, թեկուզ անզգուշաբար, բայց ինչ-որ պահի դիմակ չի կրել և դրա համար ենթարկվել է պատասխանատվության, նաև տույժի կենթարկվի Հայկ Սարգսյանը»,- նշել է Լիլիթ Մակունցը։
Լիլիթ Մակունցին և իշխանության մնացած ներկայացուցիչներին անգամ շատ վառ երևակոյության դեպքում անհնար է հավատալ, իսկ Լիլիթ Մակունցին կարելի է ընդամենը հարցնել՝ սիրելի՛ս, էդքան «շուստրի» քանի՞ քույր եք։
Ի՞նչ է նշանակում՝ կենթարկվի պատասխանատվության։ Իսկ ինչո՞ւ չի հրաժարվում մանդատից․ չէ՞ որ պարետատան կանոնները խախտելու համար ԿԳՄՍ նախարար Արայիկ Հարությունյանը պատրաստվում է պաշտոնանկ անել թիվ 114 ավագ դպրոցի տնօրեն Ռուզաննա Կոստանյանին, այդ նույն պատճառով պաշտոնից ազատվեց ԳՇ պետ Արտակ Դավթյանը։ Մինչդեռ մի քանի օր առաջ Ծիրանի ռեստորանում խնջույք է կազմակերպել նաև ոստիկանապետ Վահե Ղազարյանը։ Հանգստյան օրերին Դեբեդ գետում նավարկությամբ են զբաղվել նաև Տարածքային կառավարման նախարար Սուրեն Պապիկյանն ու մի խումբ մարզպետներ ՝դարձյալ չպահպանելով Պարետի որոշմամբ սահմանված կանոնները։
Հիմա էլ Հայկ Սարգսյանն է զվարճանում։ Ընդ որում, չճշտված որոշ լուրերի համաձայն, Սևանի կիրակնօրյա խնջույքին ներկա են եղել նաև վարչապետ Նիկոլ Փաշինյանի դուստրն ու որդին։
Հայկ Սարգսյանն առավել հայտնի է որպես Նիկոլ Փաշինյանի շիշ բռնող։ Ոստիկանապետը, ինչպես հայտնի է, Փաշինյանի դասընկերն է, նախարարն ու մարզպետներն էլ քաղաքական թիմի անդամներ են։ Այսինքն՝ նրանք, ովքեր վայելում են Նիկոլ Փաշինյանի բարձր հովանին, հանգիստ կարող են զվարճանալ՝ թքած ունենալով Պարետի որոշումների և արտակարգ դրության իրավական ռեժիմի վրա։ Իսկ նրանք, ովքեր Փաշինյանի անձնական բարեհաճությունից չեն օգտվում, պետք է իմանան, որ Հայաստանում կա օրենք, ինչպես նաև Պարետ՝ իր սահմանած կանոններով հանդերձ։ Հեղափոխական տղաները զվարճանում են՝ իրենց չխանայելով․ ի վերջո կյանքը կարճ է, իշխանությունն՝ անցողիկ, իսկ բախտը քամու պես բան է՝ մի օր հյուսիս է փչում, մի օր հարավ։
Հայկ Դավթյան
Հ․ Գ․ ԱԻՆ-ի մեքենենաները ամեն օր շրջում են Երևանի փողոցներում։ Նրանցից հնչող բամբ ձայնն այնընդհատ հիշեցնում է, որ ՀՀ-ում կորոնավիրուսի համաճարակ է, և այդ պատճառով առանց դիմակի թույլատրվում է շփվել միայն ընտանիքի անդամների հետ։ Ու՞մ համար են այս կոչերը։
ՀԳ․ Առողջապահության նախարարությունը պարբերաբար հայտարարում է, որ Սևանա լճի ջուրը ծաղկման հետևանքով թունավոր է, և այնտեղ լողալը վնաս է առողջության համար։ Ո՞ւմ համար են այս հայտարարությունները։
Հետևեք մեզ Viber-ում
