Խոշոր ու ողբերգական ավտովթար

Այսօր՝ մայիսի 11-ին, խոշոր ու ողբերգական ավտովթար է տեղի ունեցել Գեղարքունիքի մարզում: Ժամը 17:00-ի սահմաններում Սևան–Մարտունի-Գետափ ավտոճանապարհի 18-րդ կմ հատվածում բախվել են ВАЗ 2106 մակնիշի 34 ՏՏ 373 համարանիշի և ПАЗ մակնիշի 41 AV 111 համարանիշի մարդատար ավտոբուսը: Ինչպես դեպքի վայրից հայտնում է ֆոտոլրագրող Գագիկ Շամշյանը, բախման հետևանքով ավտոբուսը կողաշրվել է, իսկ 06-ն էլ գլխիվար է շրջվել: Վթարի հետևանքով 1 հոգի տեղում մահացել է, 3 հոգի էլ, որոնցից 2-ը՝ ծայրահեղ ծանր վիճակում, տեղափոխվել են Գավառի բժշկական կենտրոն: Վիրավորներին առաջինը օգնության են հասել քաղաքացիները: Դեպքի վայր են ժամանել ճանապարհային ոստիկանության 2-րդ սպայական գումարտակի 4-րդ վաշտի աշխատակիցները՝ վաշտի հրամանատար Էդգար Սուսլիյանի գլխավորությամբ: Ժամանել է նաև Արտակարգ իրավիճակների նախարարության փրկարար ծառայության Գավառի հրշեջ-փրկարարական ջոկատը: Վթարի մասին ՃՈ կառավարման կենտրոնի պատասխանատու հերթապահ Արշակ Գրիգոյանը տեղեկությունը փոխանցել է Հայաստանի քննչական կոմիտեի Գեղարքունիքի մարզային քննչական վարչություն, որտեղից ժամանել է քննչական խումբը՝ մարզային քննչական վարչության պետ Արտավազգ Ղազարյանի և տեղակալ Աքսել Մանուկյանի գլխավորությամբ: Փաստի առթիվ հատկապես կարևոր գործերով ավագ քննիչ Հարություն Մկրտչյանի որոշմամբ հարուցվել է քրեական գործ՝ ՀՀ քր. օր.-ի 242 հոդվածի 2-րդ մասի /ճանապարհատրասպորտային պատահար, որն անզգուշությամբ առաջացրել է մարդու մահ/ հատկանիշով: Ոստիկանությունն ու քննչական բաժինը պարզում են մահացածի, վարորդների և վիրավորների ինքնությունը: Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: