«Բորենիները հոշոտեցին որդուս». սպանված զինվորի մայրը լուսանկարներ է հրապարակում/ֆոտո/

Խաղաղ պայմաններում մահացած ժամկետային զինծառայող Տիգրան Օհանջանյանի գործով դատը կրկին հետաձգվել է: Նշենք, որ դեպքը տեղի է ունեցել 9 տարի առաջ: «Ես սրանց պատասխանները չեմ ստացել։ Ինչի՞ պիտի գործը կասեցնեին, ինչի՞ համար, եթե նորմալ քննություն անեին, ես ինչի՞ պիտի սրանց պատասխանը հիմա չստանայի»,- տարակուսում է Տիգրան Օհանջանյանի մայրը` Գոհար Սարգսյանը: 19-ամյա Տիգրան Օհանջանյանի ծնողները բողոքարկում են որդու մահվան գործը կասեցնելու՝ Քննչական կոմիտեի որոշումը։ 5 տարի գործը քննելուց հետո իրավապահները եզրակացրել էին՝ քանի որ իրեղեն ապացույցները չեն պահպանվել, չի պարզվել այն անձը, ով պետք է ներգրավվեր որպես մեղադրյալ։ Նախնական վարկածով՝ զինվորը մահացել է էլեկտրահարումից, ինչին ծնողները չեն հավատում։ «Աբսուրդը սա է, եթե լիներ էլեկտրահարում, իրենք պիտի պատասխանեին մի շարք հարցերի, որոնք ես պետք է տայի. Իմ երեխայի հագուստը եղել է պատառոտված, հոսա՞նքն է պատառոտել։ Մարմնի վրա վնասվածքներ կային՝ ականջը ուռած, աչքի տակը ուռած, ձեռքերի ներքևի մասում վնասվածքներ»։ Գոհար Սարգսյանը պնդում է՝ դատաբժիշկները չեն արձանագրել վնասվածքները, որոնք վկայում են մահվանից առաջ տեղի ունեցած ծեծի մասին։ Ու թեև դատարանները որոշել էին, որ դեպքի վայրում առկա էլեկտրակայանը չէր կարող զինվորի կյանքի համար վտանգավոր լինել, նոր վարկածներ այդպես էլ ի հայտ չեն եկել։ «Բանակի բորենիները հոշոտեցին իմ որդուն: Կասկածելի պայմաններում է  կատարվել սպանություն: Առայսօր ես չգիտեմ իմ էրեխու մահվան պատճառը: Պաշտոնական վարկածը էլեկտրահարում է»: Տիգրան Օհանջանյանի ծնողները վճռական են տրամադրված, նրանք համոզված են, ասում են՝ համոզված են, որ իրենց որդին սպանվել է: Դիահերձման ժամանակ հայրը` Սուրեն Օհանջանյանը,  լուսանկարել է տղայի մարմնի վրա ակներև բռնության հետքերը: Տիգրանի մայրը` Գոհար Օհանջանյանը Հայելի .am-ին ներկայացնելով այդ լուսանկարները՝ կիսվեց իր ունեցած փաստերով՝ հավաստելով, որ 6 տարի հետո միայն քննչական մարմինը ուսումնասիրելով իրենց կողմից արված լուսանկարները, եզրահանգել է, որ դրանք իրական են և մոնտաժված չեն:   Լուսինե Ղազարյան