Ադրբեջանական քարոզչական հնարքներ. պաշտոնապես հաստատեցին 12 զոհ ունենալու փաստը

2 օր է ադրբեջանական քարոզչամեքենան գործի է դրել մաշված հնարքներ՝ ցույց տալու ադրբեջանական ժողովրդի «պահանջատեր» լինելը: Նախ՝ սկսեցին մի քանի տասնյակ մարդկանց երթային կադրեր հրապարակել, թե՝ «պահանջում են ազատագրել Ղարաբաղը», մեկ մարդկանց բազմության կադրեր, որոնք, իբր՝ «շտապում են ռազմաճակատ»:

Մասնավորապես, Աղդամ գյուղում բնակիչների կուտակումների լուսանկարներ էին հրապարակվել, իբրև թե՝ «գյուղացիներին միացած շրջանի բնակիչները փորձում են գնալ-միանալ բանակին»:

Բայց իրականում Աղդամ գյուղի բնակիչները, որոնց շարքում են տնային հագուստով կանայք, ըստ ամենայնի փախչում են: Կան տեղեկությունները, որ ադրբեջանցիները պարզապես բողոքում են, որ շուտով բերքահավաք է, սակայն իրենց զինված ուժերը պատերազմ են սկսել:

Զուգահեռ պաշտոնական աղբյուրները ստիպված են նաև հաստատել զոհերի մասին տեղեկություններ: Արդեն իսկ ադրբեջանական պաշտոնական աղբյուրները հաստատել են 12 ադրբեջանցի զինվորականների կորուստների մասին:

Նախորդ օրը, ի դեպ, Ադրբեջանի Ազգային անվտանգության ծառայությունը ձերբակալել է երկրի պաշտպանության նախկին նախարար Ռագիմ Գազիևին, ով հայտարարել է, որ հայ-ադրբեջանական սահմանին տեղի ունեցած մարտական գործողությունների ընթացքում «ադրբեջանական կողմը ունի 12 զոհ»: 77-ամյա Գազիևը Ադրբեջանի ռազմական գերատեսչությունը ղեկավարել է 1992-1993 թվականներին:

Ինչ վերաբերում է հայ-ադրբեջանական սահմանին տիրող իրավիճակին՝ ընդհանուր առմամբ միջազգային մամուլը տալիս է հավասարակշռված տեղեկատվություն:
Ըստ «Ամերիկայի ձայնի»՝ Conciliation Resources կազմակերպության վերլուծաբան Լոուրենս Բրոյերսը գտնում է, որ՝ այսօր երկու երկրների իշխող վերնախավերը չափազանց խոցելի են ներքաղաքական զարգացումների ու համավարակի արդյունքում: Ադրբեջանում տնտեսական խնդիրներ են նավթի գնի անկման հետևանքով, իսկ Հայաստանում կառավարությունը քննադատության թիրախում է համավարակի դեմ պայքարի հարցում: Նա վստահ է, որ վերջին ամիսների մի շարք սիմվոլիկ քայլեր ու հայտարարություններ հասունացրեցին լարվածության աճը: «Այս բախումներն ազդարարում են նաև կողմերի՝ խաղաղության գործընթացի դինամիկայի նկատմամբ խորացող դժգոհությունները: 18 ամիս առաջ արտգործնախարարների` իրենց երկրներում խաղաղությանը նպաստող գործողություններ սկսելու հայտարարությունից ի վեր, այդ ուղղությամբ որևէ լուրջ քայլ չձեռնարկվեց», - ասում է Բրոյերսը:

Վերլուծաբանները մտահոգիչ են որակում բախումներին նախորդող Ադրբեջանի նախագահի քննադատությունը՝ ուղղված Մինսկի խմբի խաղաղ գործընթացին և միջնորդներին: Ադրբեջանում ԱՄՆ նախկին դեսպան Ռիչարդ Կազլյարիչն այն դիտարկել էր որպես ահազանգ. «Ես դա ընկալեցի որպես ահազանգ, որ Հայաստանն ու Ադրբեջանը շարժվում են դեպի առճակատման փուլ, հատկապես դիվանագիտական ջանքերի արդյունքում առաջընթացի բացակայության պայմաններում»,- ընդգծում է Ադրբեջանում ԱՄՆ նախկին դեսպանը:

Ըստ վերլուծաբանների՝մտահոգիչ է նաև, որ ընդհարումն արձանագրվել է ղարաբաղյան հակամարտության գոտուց դուրս: Փոլ Սթրոնսկին, սակայն հավելում է, որ՝ նման բախումներն աննախադեպ չեն և եղել են նախկինում: Լոուրենս Բրոյերսի կարծիքով էլ սահմանային գոտու այս ընդհարումների նպատակն էր ստուգելու միջազգային հանրության և գործընկեր երկրների արձագանքը: «Կարծում եմ՝ դա Հայաստանի գործընկերների հավատարմության, միջազգային կարծիքի և արձագանքի թեստ էր»,- ընդգծում է Բրոյերսը:

Հայ-ադրբեջանական սահմանային լարվածության անդրադարձել էին միջազգային հեղինակավոր լրատվական կայքերը՝ Aljazeera-ն, Associated press-ը, The Washington post-ը, The Republic-ը, Reuters-ը, BBC-ն: Իրավիճակին ակտիվ անդրադարձ են կատարում վրացական, ռուսական լրատվամիջոցները: