Էդ ում տունն եք քանդում ,այ կառավարություն.վարչապետի որոշումը զայրացրել է լեզվաբաններին

  «Եթե անկեղծ , ապա Լեզվի պետական տեսչությունը աշխատանքային սխրանքներով չէր փայլում, դարձել էր ինչ-որ կասկածելի մարմին, բայց այս քայլով հոնքը ուղղելու փոխարեն աչքն ենք հանում: Կարծում եմ, որ խախտվում է ՀՀ Սահմանադրությունը: Այնտեղ շատ պարզ գրված է, որ Հայաստանի պետական լեզուն հայերենն է: Թերություններն ու լեզվի դեմ ոտնձգություններն էլ, իհարկե, Լեզվի պետական տեսչությունը պետք է բացահայտի»,-Հայելի ակումբում լրագրողների հետ հանդիպմանն ասաց  լեզվաբան Նարինե Դիլբարյանը,անդրադառնալով Կառավարության որոշմանը  3 ամսում լուծարել Կրթության տեսչությունը, իսկ Լեզվի պետական տեսչությունը՝ տարեվերջին: «Այն  գործուն մարմին էր, սակայն 1998 թվականին կարգավիճակն իջեցվեց, դարձավ տեսչություն ու ծիծաղելի մի համակարգ: Գործարարը խանութին փակցնում է 1 միլիոն դրամի անգլերեն տառերով ցուցանակ, իսկ Լեզվի տեսչությունը նրան 20.000 դրամով է տուգանում: Պետության կողմից պարտադրված այդ խաղը հատուկ մտածված քաղաքականություն էր: Վարչապետին կառաջարկեի ոչ թե փակել տեսչությունը, այլ լիազորություններ տա, որպեսզի իմ երկրում անգլերեն խոշոր տառերով ցուցանակի ներքևի մասում շատ փոքր տառերով հայերենը չլինի: Թող մտքերով չանցնի, որ այս մեկ բանը կարող են մարսել: Երկրի պաշտպանության, անվտանգության միջոցներից մեկը լեզուն է: Առանց այն էլ ԱԺ-ում մեր լեզուն վաղուց վերածվել է ինչ-որ մի կենդանական բարբաջանքի »,-հայտնեց գրող, հրապարակախոս Կարինե Խոդիկյանը Հայոց լեզվի պատմության ամբիոնը պատրաստվում է դիմել  Կառավարությանը, սակայն մեկ բայց կա.«Պետք է ասեմ, որ եթե հանրային կարծիքով ամրակայված չեն այդ նախաձեռնությունները, մնում են գզրոցներում»: