Դավիթ Տոնոյանը մանրամասն ներկայացրեց իրավիճակը

Երեկ 12:30 մեր դիրքերից մեկին մոտենում է «Ուազ» ավտոմեքենա և անհասկանալի պատճառով զինծառայողները դուրս են գալիս մեքենայից և շարժվում մեր դիրք, որը գտնվում է անմիջապես ՀՀ տարածքում: Այս մասին այսօր Կառավարության հերթական նիստին՝ ներկայացնելով իրավիճակը, ասաց ՀՀ պաշտպանության նախարար Դավիթ Տոնոյանը:

«Քանի որ շարժումն անհասկանալի էր, զինծառայողները վերադասին զեկուցելիս ստանում են հրահանգ, որ հաշվի առնելով հնարավոր մոլորվածությունը, աշխարհագրությունը կամ օպերատիվ վիճակին չտիրապետելը՝ կոչ են արել լքել տարածքը։

Որից հետ սկսվում է հրետակոծություն դեպի նույն դիրքը, ինչպես նաև մարտական խմբերի շարժ, որը կասեցվել է հրետակոծությամբ և համապատախսան գործողություններով: Հակառակորդը, կրելով կորուստներ, նահանջել է»,-ասաց նա:

Դավիթ Տոնոյանը նշեց, որ մինչ այժմ նույն սցենարով տարբեր տրամաչափի հրետանի օգտագործմամբ 15-20 րոպեն մեկ հրետակոծությունը վերսկսվում է, դադարը եղելէ գիշերը 3:30-5:30:

Վարչապետ Նիկոլ Փաշինյանն էլ նախարարից փորձեց ճշտել. «Հնարավո՞ր է այդ մեքենայի հետ կապված է, ուզեցել են վերադարձնել այդ մեքենան, դրա համար են այդ գործողությունը սկսել կամ չգիտեմ..»:

Դավիթ Տոնոյանը պատասխանեց, որ եթե այդպիսի ցանկություն լիներ, երևի թե ինչ-որ ձևաչափով կապի դուրս կգային, և չկրակելու պայմանավորվածություն ձեռք բերվեր, որպեսզի ավտոմեքենան վերադարձվի: