Ծառուկյանն առերեսում է դաժան իրականությանը. Փաշինյանը շանս չունի

Հունիսի սկզբներին Կառավարության հրաժարականը պահանջող «Բարգավաճ Հայաստան» կուսակցության առաջնորդ Գագիկ Ծառուկյանի երեկվա հայտարարությունը ոմանք ընկալել են իբրեւ ետքայլ, վերլուծություններ են հնչում, թե Ծառուկյանը <<զադնի>> է դնում, չկա նախկին կոշտ էնտուզիազմը, ավելին մեկ ամիս առաջ կառավարության 100 տոկոս հրաժարականը պահանջող գործիչն այսօր նույն Կառավարությանը հորդորում է լրջանալ ու աշխատել:

ԲՀԿ-ից չեն հստակեցնում, թե արդյոք Կառավարության հրաժարականը շարունակում է մնալ իրենց օրակարգում, թե՞ ոչ, սակայն դատելով ԲՀԿ ղեկավարի հայտարարությունից եւ իրավիճակն ախտորոշելու հստակ տրամադրվածությունից, պարզ է դառնում, որ Գագիկ Ծառուկյանը Փաշինյանին հերթական անգամ ցույց է տալիս այն անմխիթար իրավիճակը, որը Հայաստանում ստեղծվել է հենց իր ու իր թիմի պատճառով: Իսկ այս իրավիճակը ոչ մի լավ տեղ չի հասցնելու, եթե անգամ Ծառուկյանը հետ կանգնի իշխանափոխության իր մտադրութուններից, Փաշինյանն ակամայից է հայտնվելու աղետի առջեւ, որից միայն հեռացումն է փրկելու: Նա կրկին հիշեցրել է նախկին ելույթը ու վերահաստատել նոր լրացումներով. «Իշխանությունը չի պատկերացնում, որ առաջիկայում ունենալու ենք 200-300 հազար նոր գործազուրկ, որ փակվում են տասնյակ հազարավոր բիզնեսներ, որ սնանկանում են բիզնեսի ամբողջական ուղղություններ։ Շատ ռեալ է բյուջեի մուտքերի թերակատարումը, որը ինչ-որ պահի կարող է անդրադառնալ բյուջետային համակարգի աշխատողների աշխատավարձերի և թոշակներ վրա, պետության այլ պարտավորությունների վրա։ Իմ ելույթը ամբողջապես այս խնդիրների բարձրաձայնումն էր, ահազանգը, որ հիմա պետք է լուրջ աշխատել, որ ժամանակ չի կարելի կորցնել, որ վաղը ուշ կլինի։ Արդյո՞ք ես գիտակցում էի, որ իմ ելույթից հետո իշխանության ռեակցիան կլինի քրեական գործեր հարուցելը, ինձ և իմ թիմակիցներին կալանավորելու փորձերը։ Ես դա համարում էի իշխանության հնարավոր ռեակցիաներից մեկը, բայց կարծում էի նաև, որ հնարավոր է՝ իմ ահազանգը տեղ հասնի ու իշխանությունը տա այլ՝ լուծումներ գտնելու, խորհրդակցելու, քննարկելու ռեակցիա»:

Ծառուկյանը հայտարարության ծավալուն մի մասը հատկացրել է տնտեսական ու սոցիալական խնդիրներին, իսկ իշխանություններին ասում է, որ Ծառուկյանից վախենալ պետք չէ: «Վախենալ պետք է հարյուր հազարավոր անաշխատանք մնացած քաղաքացիներից», - գրել է ԲՀԿ առաջնորդը, որն առաջարկում է նաև իր անձնական կապերն ու հեղինակությունը երկիրն այս վիճակից դուրս բերելու համար:
«Պետք է վերջ տալ բոլորին բոլորի դեմ թշնամացնելուն, անգրագետ պաշտոնյաներին պետք է փոխել բանիմացներով, պետք է գործ անել», - ասում է Ծառուկյանը:

Արտաքին քաղաքական հարցերում իրեն առավել քան զուսպ դրսևորած կուսակցության առաջնորդը հայտարարության մի հատված էլ նվիրում է հայ-ռուսկաան հարաբերություններին, մասնավորպես, ասելով.  «Շատ կարևոր է աշխատել հայ-ռուսական հարաբերությունների ուղղությամբ, փորձել հարթել չհասկացվածության և սառնության պահերը։ Բոլոր խողովակներով դա պիտի արվի. որպես ամենախոշոր ընդդիմադիր խմբակցության ղեկավար, որպես անձ, որը լայն շփումներ ունի ռուսական քաղաքական, հանրային, գործարար վերնախավերի հետ, ես պարտավոր եմ դա անել»:

Ակնհայտ է, որ Գագիկ Ծառուկյանը չի լղոզում իրավիճակը, չի քծնում Նիկոլ Փաշինյանին, այլ տալիս է դաժան իրականության ճշգրիտ գնահատականը, իսկ նրանք, ովքեր ԲՀԿ առաջնորդի տոնայնության մեջ մեղմացում են նկատում ու դա ընդունում որպես կոմպրոմիսի գնալու պատրաստակամություն, ապա պետք է հիշեն, թե ինչ եղավ նրա առաջին հայտարարությունից հետո եւ կարող է արդյոք Ծառուկյանը մինչեւ վերջ ոտքը գազին պահել: Հունիսին ունեցած իր հայտարարությունից հետո պետական ողջ մեքենան լծվեց նրա դեմ, քրեական գործ հարուցվեց ոչ միայն իր, այլ կուսակիցների նկատմամբ, այս պարագայում, երբ ակնհայտ է, որ Փաշինյանը իր իշխանությունը պահելու համար ոչնչի առջեւ չի կանգնելու, որեւէ մեկը մազոխիստական անկումներ չէր դրսեւորի:

Անի Սահակյան