Եթե ռուսական զենքի բալանսը խախտվի. պաշտոնական Երևանի նախազգուշացումը

Հայաստանում հասարակությունն ուշիուշով հետևում է Ռուսաստանի կողմից Ադրբեջանին զենք մատակարարելու քայլերին, հատկապես երբ դա տեղի է ունենում հակամարտության սրման պահերին, «Ինտերֆաքս»-ին տված հարցազրույցում ասել է ՀՀ պաշտպանության նախարար Վիգեն Սարգսյանը: «Այդպիսի սպառազինության կիրառման ամեն դեպք, բնականաբար, Հայաստանում շատ լուրջ կրքեր է առաջացնում՝ հաշվի առնելով մեր ժողովրդի հատուկ վերաբերմունքը Ռուսաստանի նկատմամբ»,- ասել է նա: Նախարարը նշել է, որ` «եթե ռուսական զենքը հավասարակշռության խախտման արդյունքում դառնա հակամարտության մեջ ռիսկի գործոն, ապա դա ձեռնտու չի լինի հենց Ռուսաստանին»: Անդրադառնալով Արցախի հակամարտության լուծմանը՝ Վիգեն Սարգսյանը նշել է, որ այն ռազմական լուծում չունի: «Մենք մեծ հույսեր ունենք, որ դա լավ են հասկանում նաև Ադրբեջանում: Մենք մեծ հույսեր ունենք, որ մարդիկ, ովքեր պատասխանատու են որոշումների կայացման համար Բաքվում, գիտակցում են, որ շատ հեշտ է բացել քաոսի և իրական լայնածավալ ռազմական գործողությունների, ամբողջ տարածաշրջանում էսկալացիայի դռները, որոնք դադարեցնելը շատ դժվար կլինի: Դա պարտադիր կերպով կուժեղացնի ահաբեկչական խմբավորումների դերը տարածաշրջանում, կմեծանա նաև ոչ տարածաշրջանային խաղացողների դերը, որոնք կսկսեն օգտվել դրանից»,- ասել է նախարարը: Վիգեն Սարգսյանի խոսքով՝ այդ «Պանդորայի արկղ բացելը միշտ կարելի է», մինչդեռ դրանից հետո հակամարտությունը կարգավորելը անչափ դժվար է: «Այդ առումով ես մեծ հույսեր ունեմ, որ արտգործնախարարներին կհաջողվի գտնել դիրքորոշումների մերձեցման նոր կետեր: Չնայած հնարավորությունների շրջանակը միանգամայն սահմանափակ է»,- ասել է նա: Այսպես, ՀՀ Պաշտպանության նախարարը, փաստորեն, հստակ խոսել է տարածաշրջանում ռուսական սպառազինությամբ հավասարակշռության խախտման վտանգի մասին, թեև այն կապել է ռուսական կողմի համար վտանգի հետ: Պնախարարի արձանագրումն, իհարկե, դաս չէ Մոսկվայի համար, մանավանդ, որ ռուսական կողմը այդօրինակ «դասերին» ուղղակի ուշադրություն չի էլ դարձնի: Առավել ուշագրավ է այն, որ հայկական կողմն է խոսում ռուսական սպառազինության հավասարակշռության վտանգի մասին, ինչը նշանակում է, որ պաշտոնական Երևանն էլ է արձանագրում, որ Մոսկվան ավելի շատ սպառազինություն է վաճառում Բաքվին, քան Հայաստանին: Ավելին, ռուսական լրատվամիջոցին տված հարցազրույցում Վիգեն Սարգսյանը նույնիսկ հորդորել է Կրեմլին անվերապահորեն չընդունել Անկարայի հետ ջերմացող հարաբերությունները՝ պնդելով՝ ՆԱՏՕ-ի անդամ Թուրքիան իրականում լուրջ սպառնալիքներ է ստեղծում Մոսկվայի համար Ռուսաստանի հարավային ճակատում: «Երբ մենք խոսում ենք տարածաշրջանի երկրների և ՆԱՏՕ-ի անդամների միջև փոխգործակցության ու այլ հարցերի մասին, պետք է փաստենք, որ այդ դաշինքից մեր տարածաշրջանում ամենաշատը ներկայացված երկիրը Թուրքիան է, որը բացահայտ և անմիջապես Ռուսաստանի սահմանների մոտ՝ Ադրբեջանում, շատ ակտիվ ռազմաքաղաքական գործունեություն է ծավալում», - ասել է Վիգեն Սարգսյանը հավելելով,- «Ես հասկանում եմ, որ հիմա Ռուսաստանի և Թուրքիայի միջև երկխոսության շատ դրական փուլ է, սակայն, այդուամենայնիվ, չէի անտեսի նման լուրջ վտանգը»: Փաստելով, որ ղարաբաղյան խնդրում իրավիճակը շարունակում է մնալ անկայուն, Սարգսյանն ընդգծել է․«Թուրքիան բացասական դեր է խաղում նաև այս հարցում՝ հրապարակավ աջակցելով Ադրբեջանին սպառազինության ու տեխնոլոգիաների մատակարարման, հրահանգիչների ուղարկման և շատ այլ առումներով, ինչը զգալիորեն փոխում է դինամիկան տարածաշրջանում»: «Սա շատ լուրջ վտանգներ է ստեղծում, այդ թվում՝ Ռուսաստանի հարավային ճակատում՝ Դաղստանի սահմանների մոտ»,- ասել է ՀՀ Պնախարարը «Ինտերֆաքս»-ին տված հարցազրույցում: Թամար Բագրատունի