Բաժակաճառեր՝ ցածր մակարդակի պաշտոնյաների հետ զրույցներով
Օրեր առաջ Նիկոլ Փաշինյանը շնորհավորական ուղերձ է հղել ԱՄՆ-ի նախագահ Դոնալդ Թրամփին՝ ԱՄՆ Անկախության օրվա կապակցությամբ: Նրա ուղերձում ասված է.
«Երկու տարուց ի վեր Հայաստանի իշխանությունները շարժվում են համապարփակ ինստիտուցիոնալ բարեփոխումների իրականացման ճանապարհով: Այն պետք է հանգեցնի ժողովրդավարության և օրենքի գերակայության վերջնական հաստատմանն ու անշրջելիությանը մեր երկրում: Կոռուպցիայի դեմ պայքարն ու դատաիրավական համակարգի բարեփոխումներն այս առումով առաջնային տեղ են զբաղեցնում մեր այսօրվա օրակարգում:
Մենք երախտապարտ ենք Հայաստանում ժողովրդավարական բարեփոխում-ների նկատմամբ ԱՄՆ ցուցաբերած զորակցության և ֆինանսական ու տեխնիկական աջակցության համար: Բարձր ենք գնահատում նաև այս օրերին աշխարհը պատուհասած համաճարակի դեմ պայքարի համար Ձեր վարչակազմի կողմից Հայաստանին տրամադրվող օժանդակությունը: Հայաստանը մեծապես արժևորում է Միացյալ Նահանգների հետ բարեկամական հարաբերությունների հետագա զարգացումը՝ մեկ տարի առաջ հաստատված ռազմավարական երկխոսության շրջանակում: Կարևոր ենք համարում ուժերի ներածի չափով մեր շարունակական մասնակցությունը միջազգային ահաբեկչության դեմ պայքարի և միջազգային անվտանգության ապահովման համար ԱՄՆ նախաձեռնություններին։ Բարձր ենք գնահատում ԱՄՆ կառուցողական ներգրավվածությունն ու հավասարակշռված քաղաքականությունը Լեռնային Ղարաբաղի հակամարտության խաղաղ կարգավորման գործընթացում»։
Ապա` Փաշինյանը հիշեցրել էր, որ այս տարի նշում ենք Հայաստանի Առաջին Հանրապետության և ԱՄՆ-ի միջև դիվանագիտական հարաբերությունների հաստատման 100-ամյա տարեդարձը: «Պատմական այս նշանակալից փաստը, հիրավի, առանձնահատուկ զգացմունքային երանգ և բովանդակություն է հաղորդում մեր գործընկերությանը: Ընդհանուր ժողովրդավարական արժեքների հետ միասին այն ամուր հենք է ստեղծում մեր երկու երկրների բարեկամության հարատև զարգացման և առաջընթացի համար»։
Զոհրաբ Մնացականյանը նույնպես հանդես եկել ԱՄՆ Անկախության օրվա առթիվ՝ արձանագրելով, որ Հայաստանի և ԱՄՆ-ի միջև յուրահատուկ կապ կա, որն առանձնանում է փոխադարձ համակրանքով ու վստահությամբ:
Բացի հարգանքից ու երախտիքից՝ ԱՄՆ Ներկայացուցիչների պալատին ու Սենատին՝ Հայոց ցեղասպանության համար, բացի ղարաբաղյան կարգավորման գործընթացում՝ ԵԱՀԿ Մինսկի խմբի ձևաչափում ԱՄՆ ներգրավվածության համար բարձր գնահատականից, բացի՝ Հայաստանի անկախությունից ի վեր՝ ամերիկյան ֆինանսական աջակցության համար շնորհակալական խոսքերից՝ արտգործնախարարի խոսքում հայ-ամերիկյան որևէ կոնկրետ նախաձեռնության, ծրագրի, տեսլականի մասին խոսք չկա:
Առհասարակ, երկու տարուց ավելի խոսվում է, թե ինչ օրակարգ ունի Հայաստանը Վաշինգտոնի հետ, եթե կա ակնկալիք փոքր-ինչ բարձր մակարդակով քննարկումների, հեռախոսազրույցների ու բանակցությունների հասնելու համար...
Ունի՞ Փաշինյանը նման օրակարգ, կամ՝ գոնե փորձ է արել մշակել նման օրակարգ, ինչ-որ բան առաջարկել ԱՄՆ-ին... Չկա՛:
Այս պայմաններում՝ կարելի՞ է խոսել հայ-ամերիկյան փոխշահավետ հարաբերությունների մասին...
Ո՛չ: Հետևաբար քանի դեռ այս մթնոլորտն է, դատարկ, արարողակարգային բաժակաճառերի մակարդակով արձանագրումներով՝ Հայաստանի արտգործնախարար Զոհրաբ Մնացականյանի հետ ամերիկյան կողմից հեռախոսազրույց կարող է վարել այդ մակարդակի պաշտոնյա՝ ԱՄՆ պետքարտուղարի եվրոպական և եվրասիական հարցերով տեղակալի պաշտոնակատարը: Օրերս մի հեռախոսազրույց եղավ այս պաշտոնյայի հետ՝ Ֆիլիպ Ռիքերի:
Մնացականյանը շնորհակալություն էր հայտնել ԱՄՆ կառավարությանը՝ Հայաստանին ցուցաբերվող ֆինանսական աջակցության համար։ Այնուհետև ԱԳՆ-ի տարածած մամլո հաղորդագրությունից հայտնի էր դառնում, որ Մնացականյանը և Ռիքերն անդրադարձել են երկկողմ օրակարգի մի շարք հարցերի: «Կարևորվել է հայ-ամերիկյան ռազմավարական երկխոսության և Առևտրի ու ներդրումների հայ-ամերիկյան խորհրդի շրջանակներում ինչպես հեռավար, այնպես էլ՝ համավարակից հետո անմիջական ձևաչափով շփումների շարունակումը և ձեռք բերված պայմանավորվածությունների իրականացումը», և նման արարողակարգային այլ ձևակերպումներ:
Նաև նշվում էր, որ Մնացականյանը և Ռիքերը քննարկել են նաև միջազգային և տարածաշրջանային կարևորության մի շարք հարցեր. «Հայաստանի ԱԳ նախարարը և ԱՄՆ պետքարտուղարի եվրոպական և եվրասիական հարցերով տեղակալի պաշտոնակատարը մտքեր են փոխանակել Լեռնային Ղարաբաղի հիմնախնդրի կարգավորման գործընթացի վերջին զարգացումների շուրջ»:
Ահա, ոչ մի կոնկրետություն, ոչ մի նախաձեռնողական ծրագիր, ապագային ուղղված ոչ մի կոնկրետ գործընթացի ու տեսլականի արձանագրում:
Մետաքսյա Շալունց
Հետևեք մեզ Viber-ում
