Քանդել, քանդել մինչեւ վերջ․ հերթը հիվանդանոցներինն է
Իշխանություններն այս օրերին օրենսդրական փոփոխություններ են նախաձեռնում, որոնք նպատակ ունեն արտակարգ դրության պայմաններում տարբեր համակարգերի կենտրոնացված կառավարում ապահովել:
Ներկայումս նման նախաձեռնություն են հանդես բերել առողջապահության եւ կրթության ոլորտների վերաբերյալ:
Եթե կրթական ոլորտի վերաբերյալ դեռեւս ձեռնպահ կմնանքն կարծիք հայտնել, ապա առողջապահականի դեպքում իշխանությունների այս մտադրությունները աղետի մոտալուտ զգացողություններ են առաջացնում: Եւ այսպես, ինչ է պատրաստվում պատկան գերատեսչությունը: Անցած շաբաթ նախարարությունը հայտարարությամբ հանդես եկավ, որ նախաձեռնում է ՀՀ բոլոր բժշկական կենտրոնների կառավարումը առողջապահության նախարարությանը փոխանցելու լիազորություն սահմանել, անկախ բուժհաստատությունների ենթակայության եւ սեփականության ձեւից:
«Համաձայն սպասվող օրենսդրական փոփոխությունների՝ արտակարգ դրության ժամանակահատվածում կառավարությանը կտրվի լիազորություն՝ Հայաստանի Հանրապետության բոլոր բժշկական կենտրոնների կառավարումը փոխանցելու առողջապահության նախարարությանը՝ անկախ բուժհաստատությունների ենթակայության եւ սեփականության ձեւից։ Փոփոխության համաձայն՝ առողջապահության նախարարությունը կկարողանա ըստ անհրաժեշտության իրականացնել լիցենզավորված բոլոր բժշկական հաստատությունների կառավարումը, իրավունք կունենա նշանակել ժամանակավոր տնօրեններ, որոնք ուղղակիորեն կենթարկվեն նախարարությանը եւ կկատարեն նախարարի ցուցումները, որպեսզի ապահովվի արտակարգ դրության ժամանակ անհրաժեշտ բժշկական ծառայությունների ամբողջ ծավալով մատուցումը»։
Նմանատիպ կարգավորում նախատեսված է ռազմական դրության իրավական ռեժիմի մասին օրենքի 11-րդ հոդվածով, որով սահմանված է, որ բոլոր բժշկական կենտրոնների կառավարումն (անկախ սեփականության ձեւից) անցնում է առողջապահության նախարարությանը: Օրենսդրական փաթեթը հաջորդ շաբաթ կներկայացվի Ազգային ժողով։
Իշխանության այս նախաձեռնությունը կյանքի կոչվելուց հետո կարող են վերջնականապես մի բուռ հող լցնել բոլոր մասնավոր հիվանդանոցների վրա, որտեղ իշխանության ապաշնորհ ձեռքը դեռեւս չի հասնում: Այն, ինչ անում է իշխանությունը կորոնավիրուսի դեմ պայքարում, տեսնում են բոլորը, ավելի ճիշտ՝ իշխանությունը գրեթե ոչինչ չի անում, բացառությամբ արտակարգ իրավիճակը ծառայեցնելով քաղաքական նատակների իրագործմանը: Հերթական ու արտահերթ ԱԺ նիստեր են գումարվում մեկը մյուսի ետեւից, Սահմանադրական դատարան է բռնազավթում, իսկ կորոնավիրուսով պայմանավորված դժոխային իրավիճակն օրեցօր վատթարանում է: Ու այս պայմաններում իշխանությունը չգիտես ինչու որոշել է իր ձեռքը վերցնել նաեւ մասնավոր բուժհաստատությունները: Տպավորություն է, որ արտակարգ դրությունը հենց սրա համար են երկարացնում, որպեսզի իշխանությունն ամեն բան իր ձեռքը վերցնի՝ սկսած մեր հեռախոսազանգերի տեղորոշումից, քաղաքական պայքարը զսպելուց ու միտինգներն արգելելուց, վերջացրած ուրիշի փոխերը հաշվելուց:
Մի շարք ԲԿ-ներից արդեն ահազանգել են այս վտանգավոր նախաձեռնության մասին՝ նկատելով, որ այն ֆինանսական հոսքերը վերահսկելու նպատակ է հետապնդում, հակառակ դեպքում ծիծաղելի է մտածել, թե Արսեն Թորոսյանին թվում է, որ իրենց լակոտակրատիայի ներկայացուցիչներն ավելի պրոֆեսիոնալ են ու համաճարակի դեպքում ավելի լավ կղեկավարեն հիվանդանոցները, քան օրինակ դա անում են Իզմիլյան կենտրոնում կամ Էրեբունի հիվանդանոցում:
Անի Սահակյան
Հետևեք մեզ Viber-ում
