Երբ հաճախորդն արդեն «դիակ է»

«Լուսավոր Հայաստան» կուսակցությունն այսօր կնքեց մահկանացուն:Այո, այս կուսակցությունն ու իր նախագահը նույնիսկ արժանի չեն ՕԵԿ-ի եւ Արթուր Բաղդասարյանի հետ համեմատվելուն, քանի որ Մարուքյանից եւ իր կուսակցությունից էր կախված՝ ուզում ենք արդյոք ունենալ իրավական եւ ժողովրդավարական համակարգ, թե դառնալով իշխանությունների հանցակիցը ասպատակում ենք Սահմանադրությունը, երկրում հաստատում մեկ մարդու բռնապետություն, ում խելքին որ պահին ինչ բրդում է, ուրեմն պարտադիր իրականություն պետք է դառնա:

Ինչպես եւ սպասվում էր, ԼՀԿ-ն չմիացավ ԲՀԿ-ին, եւ իշխանությունների ընդունած հակաօրինական նախագիծն այլեւս կյանքի կկոչվի, որով կդադարեցվեն ՍԴ երեք դատավորի լիազորությունները, իսկ Հրայր Թովմասյանը կդադարի լինել ՍԴ նախագահ: Մարուքյանը, իսկապես, դժվարին ընտրության առջեւ էր կամ պետք է կողմնորոշվեին օրենքի ու պետության շահի կողմը, կամ իշխանությունների: Մեծ հաշվով նրանք ընտրեցին վերջին տարբերակը, բայց փորձեցին այն փաթեթավորել իրենց կողմից այդքան սիրված երրորդ ճանապարհի շղարշով: Մարուքյանը երկար բարակ լապշաներ փորձեց կախել իր նմանների ականջին, թե չեն ցանկանում կողմ դառնալ ոչ ներկա, ոչ նախկին իշխանություններին, կդիմեն ՍԴ, երբ ավարտվի Ռոբերտ Քոչարյանի գործով հայցի քննությունը, հիշեցնենք այն նշանակված է հուլիսի յոթին:

-Հենց այդ գործով նիստը կավարտվի ՍԴ կմուտքագրվի այս բոլոր խնդիրների հետ կապված, հակասահմանադրական ճանաչելու հետ կապված դիմումը: Այսինքն՝ այստեղ օրերի հարց է: ԼՀԿ-ն գործընթացը միանշանակ և աներկբա պահպանելու է իրավական տիրույթում, և որևէ ձևով թույլ չենք տալու, որ հակամարտ կողմերից մեկն իրեն ծառայեցնի այս գործընթացը», - ասում է Մարուքյանը՝ ըստ ամենայնի փորձելով Ռոբերտ Քոչարյանին իր հաճախորդության փրկօղակը դարձնել:
Թեեւ Մարուքյանը ողջ ասուլիսի ընթացքում երդում-պատառ էր ուտում, թե իշխանություններից որեւէ մեկն իր որոշման վրա չի ազդել, ոչ էլ ճնշել են, բայց որեւէ կերպ չկարողացավ հիմնավորել որոշման հիմքերը:
Հարց հնչեց, իսկ ինքը վստահ է, որ այդ նիստից հետո, երբ արդեն իշխանությունները ՍԴ կազմը կհամալրեն իրենց կամակատար դատավորներով, իրենց դիմումը վարույթ կընտրի, այն, պարզվեց՝ այո, վստահ է: Քանի որ իր հաշվարկով ՍԴ-ում համամասնություն չի փոխվելու, իշխանության փոփոխություններով ընդամենը երկու դատավորի պաշտոնավարումն է դադարեցվելու, երբ հիշեցրեցին, որ Ալվինա Գյուլումյանի վրա նույնպես տարածվելու է փոփոխությունը, լուսավորյալները ապշեցրեցին իշխանության նկատմամբ իրենց վստահությամբ՝ ասելով, թե իշխանությունը չի գնա անօրինական ճանապարհով: Լրագրողները կրկին հիշեցրեցին, որ սահմանադրական փոփոխությունների ամբողջ գործընթացն էր այդպիսին՝ հակաօրինական ու հակասահմանադրական, ինչն է խանգարում, որ Գյուլումյանի հետ էլ նման կերպ վարվել, ԼՀԿ-ականները ընկրկեցին, թե բա ճիշտ եք ասում, բայց միեւնույն ժամանակ անհույս վրա բերեցին, թե հուսավառված կսպասեն:

Անի Սահակյան