«ԲՀԿ»-ն ու Գագիկ Ծառուկյանը զղջում ե՞ն Նիկոլ Փաշինյանին ու հեղափոխությանը աջակցելու համար.Միքայել Մելքումյան (video)
Այս տարվա մարտ-ապրիլ ամիսներին կորոնավիրուսով պայմանավորված մենք ասում էինք՝ ժամանակը չէ քննադատության, պետք է պայքարենք կորոնավիրուսի դեմ,բայց, երբ տեսանք, որ համավարակը տարածվում է, մահերի թիվն աճում, «Բարգավաճ Հայաստան»-ը քաղհորհրդի նիստ հրավիրեց ու Գագիկ Ծառուկյանը հայտարարեց, որ այս պայմաններում Կառավարությունը պետք է հրաժարական տա։ Այս մասին Արմնյուզ ՀԸ՝ Անժելա Թովմասյանի հեղինակային «Հայելու առաջ» հաղորդման ժամանակ ասել է «Բարգավաճ Հայաստան» կուսակցության փոխնախագահ Միքայել Մելքումյանը։
Ըստ Միքայել Մելքումյանի՝ Գագիկ Ծառուկյանը քաղաքական բանավեճի դիմումով էր հանդես եկել․ «Եթե կառավարման այս ձևն օգուտ չի բերում երկրին, պետք է համախմբվել ու միասին այս իրավիճակից դուրս գալ։ Մենք ասում ենք՝ օգոստոս-սեպտեմբերին երկիրն ընկնելու է տնտեսական կոլապսի մեջ»։
Դիտարկմանը՝ իշխանությունը պնդում է, որ Գագիկ Ծառուկյանը վաղուց է իմացել, որ ինչ-որ քրեական գործեր կան, որոնք մոտենում են ավարտին, դրա համար է նախահարձակ եղել, որպեսզի հետո ասի՝ քաղաքական հետապնդման է ենթարկվում, Միքայել Մելքումյանը նշել է․ «Քաղաքական առումով իշխանությունը դեմագոգիկ հայտարարություններ է անում։ Ծառուկյանն ամիսներ առաջ էր ասել, որ Կառավարությունը 97 տոկոսով պետք է փոխվի»։
Միքայել Մելքումյանի համոզմամբ՝ Գագիկ Ծառուկյանի հայտարարությունները տրամաբանական հաջորդականությամբ են եղել։
Հարցին՝ ԱԺ փոխխոսնակ Ալեն Սիմոնյանն այսօր նշել էր, որ այս գործընթացներին քաղաքական երանգ տալով՝ Դուք փորձում եք սակարկումների գնալ, ինչը եղել է նաև Սերժ Սարգսյանի օրոք, Միքայել Մելքումյանը պատասխանել է․ «Գագիկ Ծառուկյանն այն մարդն է, որ երբեք չի ձգտել որևէ քաղաքական-պետական պաշտոնի։ Ես չգիտեմ՝ ինչ սակարկումների մասին է խոսքը։ Մենք ընդդիմադիր հիմնական քաղաքական ուժն ենք, այդ իշխանությունն է նման հայտարարություններով սակարկումների մասին խոսում»։
Միքայել Մելքումյանը հիշեցնում է, որ դեռ երկու տարի առաջ իրենց կուսակցությունն ու Գագիկ Ծառուկյանը աջակցել են հեղափոխությանն ու Նիկոլ Փաշինյանի վարչապետ ընտրվելուն։
Դիտարկմանը՝ փոշմանու՞մ եք աջակցելու համար, Միքայել Մելքումյանը ասել է․ «Ոչ, չենք փոշմանել։ Այդ պահին ինչ ճիշտ էր դա ենք արել։ Ժողովրդի կամքն էր դա»։
Հետևեք մեզ Viber-ում
