ԼՂ-ն երկիր է,այլ ոչ թե հակամարտություն.նախարար

Interfax գործակալությանը տված հարցազրույցում ՀՀ պաշտպանության նախարար Վիգեն Սարգսյանը հայտարարել է,որ Լեռնային Ղարաբաղը թեկուզև չճանաչված, բայց երկիր է, այլ ոչ հակամարտություն, և մինչև տեղի չունենա այդ փաստի լիակատար գիտակցում, կարգավորում չի լինի: «Միակ գործոնը, որը հայտնվում է ուժի կիառման արդյունքում, այս կամ այն կողմի վրա ճնշում գործադրելն է՝ բանակցային գործընթացում ավելի մեծ ճկունություն ցուցաբերելու համար: Արդյունքում միևնույն է պետք է լինեն բանակցություններ, միևնույն է պետք է լինի խաղաղություն, պետք է լինի խաղաղ համաձայնագիր: Եվ որքան ավելի խորը փակուղի է մտնում հակամարտությունը, ատելությունը, ագրեսիան, այնքան ավելի է է դժվարանում լուծել նման հակամարտությունը»,-ասել է Վիգեն Սարգսյանը: «Արցախյան հակամարտությունը ռազմական լուծում չունի:  Մենք հույս ունենք, որ դա հասկանում են նաև Ադրբեջանում: Մենք հույս ունենք, որ Բաքվում որոշումների կայացման պատասխանատու մարդիկ գիտակցում են, որ շատ հեշտ է բացել քաոսի և լայնածավալ ռազմական գործողությունների, ամբողջ տարածաշրջանում էսկալացիայի դռները: Դա անպայմանորեն կուժեղացնի տարածաշրջանում ահաբեկչական խմբերի դերը, կաճի նաև արտաքին խաղացողների դերը, որոնք կսկսեն դրանից օգտվել»,- ասել է Վիգեն Սարգսյանը: «ԼՂ թեկուզև չճանաչված, բայց երկիր է, ոչ թե հակամարտություն և քանի դեռ տեղի չի ունեցել այս փաստի լիակատար գիտակցում, կարգավորում չի լինի:  Այնտեղ արդեն մեկ քառորդ դար դե ֆակտո անկախության պայմաններում իրական մարդիկ են ապրում: Նրանք պատասխանատու են իրենց որոշումների կայացման համար, նրանք ժողովրդավարական սկզբունքների, ազատ ընտրությունների հիման վրա ձևավորում են իրենց կառավարությունը, տեղի է ունենում բազմախմբակցական խորհրդարանի ձևավորում»,-հավելել է Վիգեն Սարգսյանը: