Արգիշտի Քյարամյանն ատրճանակից օգտվել գիտի՞, երբևէ վառոդի հոտ զգացել է՞. Գառնիկ Իսագուլյան (տեսանյութ)
Աշխարհում առաջին անգամ հատուկ ծառայությունների ղեկավար է նշանակվում մեկը, ով այդ ծառայության հետ որևէ կապ չունի: Այս մասին Արմնյուզ ՀԸ Անժելա Թովմասյանի՝ «Հայելու առաջ» հեղինակային հաղորդման ժամանակ ասել է «Ազգային անվտանգություն» կուսակցության նախագահ Գառնիկ Իսագուլյանն՝ անդրադառնալով ԱԱԾ պետի փոփոխությանը:
Հիշեցնենք, որ Նիկոլ Փաշինյանի որոշմամբ՝ ԱԱԾ պետ է նշանակվել Արգիշտի Քյարամյանը, ով մինչև այս պաշտոնին նշանակվելը շատ արագ մի քանի պաշտոններ է ունեցել:
Ըստ Գառնիկ Իսագուլյանի՝ ԱԱԾ-ում անգամ մաքրող-մաքրուհի աշխատելու համար պետք է մարդ մոտ վեց ամիս նախապատրաստական փուլ անցնի. «Մենք մինչև անգամ չգիտենք՝ ո՞վ է Արգիշտի Քյարամյանի հայրը, իսկ մենք հիշում ենք, որ այս հարցի վերաբերյալ մամուլում շատ հրապարակումներ են եղել: Հիմա մենք ինչպե՞ս ենք այս կարևոր կառույցը վստահում նրան: Ինձ հետաքրքրում է՝ Արգիշտի Քյարամյանը երբևէ վառոդի հոտ զգացել է՞, կամ ատրճանակից օգտվել գիտի՞, թե՞ ոչ»:
Քաղաքական գործիչը չգիտի՝ Նիկոլ Փաշինյանի այս աննախադեպ նշանակումն ինչ ազդեցություն կունենա ԱԱԾ կառույցի վրա. «Ես գիտեմ մի բան՝ Նիկոլ Փաշինյանը վախենում է:Նա հասկանում է՝ իր շրջապատում այլևս աջակիցներ չեն մնացել, դրա համար էլ ուժայիններում նշանակում է այնպիսի մարդկանց, ովքեր կկատարեն իր հրամանները»:
Գառնիկ Իսագուլյանի խոսքով՝ Նիկոլ Փաշինյանը հոգեվարքի մեջ է, դրա համար էլ այսպիսի նշանակումներ է անում. «Հիշե՛ք՝ Նիկոլ Փաշինյանը կա՛մ ցմահ դատապարտվելու է, կա՛մ աքսորվելու է իր հայրենի գյուղ»:
Խոսելով կորոնավիրուսով պայմանավորված երկրում ստեղծված իրավիճակի մասին՝ Գառնիկ Իսագուլյանն ասել է. «Խոսում ենք կադրերից. Նիկոլ Փաշինյանը Առողջապահության նախարար է նշանակել այնպիսի մարդու, որի օրոք տեսնում ենք՝ կորոնավիրուսի պատկերը Հայաստանում ինչպիսին է: Ամբողջ աշխարհում թվերը նվազում են, իսկ մեզ մոտ սարսափելի արագությամբ աճում»:
Գառնիկ Իսագուլյանի խոսքով՝ Նիկոլ Փաշինյանին ու այս իշխանությանը ձեռնտու է, որ Հայաստանում վարակակիրների թվերն աճեն:
Դիտարկմանը՝ շատ անպատասխանատու հայտարարություն եք անում, Գառնիկ Իսագուլյանը պատասխանել է. «Ես շարքային քաղաքացի եմ ու նման բան եմ ասում, իսկ, երբ երկրի ղեկավարն է ասում, որ ընդդիմությանը ձեռնտու է, որ Հայաստանում կորոնավիրուսի թվերն աճեն, դա ի՞նչ է»:
Գառնիկ Իսագուլյանի համոզմամբ՝ Նիկոլ Փաշինյանն ու Արսեն Թորոսյանը պետք է պատասխանատվության ենթարկվեն նրա համար, որ շատ բուժհաստատություններ չեն տրամադրում կորոնավիրուսով վարակակիրների բուժման համար:
Հետևեք մեզ Viber-ում
