Պյոտր Սվիտալսկին խորհուրդ տվեց սպասել
Հայաստանում ԵՄ պատվիրակության ղեկավար, դեսպան Պյոտր Սվիտալսկին այսօր լրագրողների հետ հանդիպմանն ասաց, որ մայիսի 9-ին նշում են նաև Եվրոպայի համերաշխության և միասնության տոնը: Իսկ մինչ այդ սկսվում են նշվել Եվրոպայի օրերը: Ինչպես տեղեկացրեց՝ ԵՄ պատվիրակության կողմից կազմակերպված դասական երաժշտության համերգ է եղել՝ Հայաստանի Ազգային ֆիլհարմոնիկ նվագախմբի, «Հայաստանի երեխաներ» երգչախմբի և ՀՀ մարզերի գեղարվեստի դպրոցների սաների մասնակցությամբ «Եվրոպան հանուն խաղաղության» խորագրով և նման միջոցառումներ լինելու են նաև Վանաձորում, Գյումրիում, Եղեգնաձորում, Կապանում, Սիսիանում: Լրագրողներից մեկի դիտարկմանը, թե Հայաստանում ԵՄ դրամաշնորհային ծրագրերի համակարգող Մարինե Պապյանին առաջադրվել էր մեղադրանք՝ ծրագրերի համար հատկացվող փողի հափշտակության համար, ինչ կարծիք ունի այդ մասին նա, նշեց. «Արդեն տեսել եմ որոշակի հրապարակումներ, որ այս խարդախության դեպքերը կարող են բացասաբար ազդել ՀՀ-ԵՄ փոխհարաբերությունների վրա, ես կարծում եմ՝ հակառակը, փոխհարաբերությունը կարող է խորանալ՝ շնորհիվ այս համատեղ աշխատանքի, որը սերտ է Քննչական կոմիտեի ու ՕԼԱՖ-ի կողմից: Ես ակնկալում եմ, որ Քննչական կոմիտեն նույն լրջությամբ կվերաբերի այն ազդակներին, որոնք հասնում են իրենց տեղական կառույցներից, ինչպես որ վերաբերեցին մեզ, կարիք չկա անմիջապես գնալու եզրակացությունների, սպասենք, դատողություններ չանենք, դա դատարանի իրավունքն է»:
Հետևեք մեզ Viber-ում
