Սասուն Միքայելյանը հաթաթա է տալիս
Գագիկ Ծառուկյանի հայտարարությունը Հայաստանում իրավիճակ է փոխել, իշխանությունները ահուսարսափի մեջ, այդ մասին է մատնում նրանց քայլերը:
ԵԿՄ վարչության նախագահ Սասուն Միքայելյանը հայտարարություն է տարածել, որում նախ երկար-բարակ բացատրում է երկրապահի դերն ու առաքելությունը. «սա մի կառույց է, որն ստեղծվել է պատերազմի բովում, ստեղծվել է, որպեսզի պաշտպանի մեր երկրի սահմանները, մեր պետականությունը, մեր պետության անդորրը: Գրեթե երեսուն տասնամյակ առաջ ծնունդ առած այս կազմակերպության հիմնական նպատակն ու դիրքորոշումը մեկն է ու այն անքննելի է' Երկրապահը երկիր ստեղծող, երկիր պահող ու շենացնող է: Երկրապահը պահել ու պահելու է ժողովրդի ներքին եւ արտաքին անվտանգությունը»:
Ապա հիշեցնում, թե ինչպես նախորդ իշխանությունների օրոք հենց ազգային ժողովի դահլիճում իրենք կորցրեցին առաջնորդին: «Նախորդ իշխանության վերադարձի, նախորդ ամեն ինչի մասին խոսելն արդեն իսկ անիմաստ է: ԵԿՄ հիմնադիր, հավերժ նախագահ Վազգեն Սարգսյանի հայրենասիրությունն անսահման էր, նա հավատում էր, որ 21-րդ դարը մերն է լինելու: Մենք պարզապես պարտավոր ենք շարունակելու նրա գործը՝ պահպանելով այն գաղափարախոսությունը, որ երկրապահը բանակի հիմքն ու հիմնաքարն է՝ եղել է ու կլինի բանակի կողքին, երկրապահը ժողովուրդն է, այն ժողովուրդը, որը իր մեջ ուժ գտավ, վերջապես ծնկի բերեց մեր դարավոր թշնամուն եւ ազատագրեց Արցախ աշխարհը»:
Ապա հասել է բուն ասելիքին. «Ես հորդորում եւ կոչ եմ անում ԵԿՄ վարչության եւ ԵԿՄ բոլոր անդամներին զերծ մնալ այնպիսի հրապարակային հայտարարություններից, որոնք չեն արտահայտում Երկրապահ կամավորականների միության դիրքորոշումը կամ հակասում են գաղափարախոսությանը: Հարկ եմ համարում շեշտել՝ այսուհետ վարչության հետ չհամաձայնեցված հայտարարություններ տարածելուց եւ/կամ երկրապահի անունն անտեղի շահարկելուց այդ անձանց հարցը կդրվի վարչության նիստում: ԵԿՄ-ն կիսառազմական կառույց է, եւ մեր բոլոր նախաձեռնությունները կիրականացվեն ըստ ԵԿՄ կանոնադրության: Համավարակի այս օրերին առավել կարեւոր է մեր բոլորի ջանքերի մեկտեղումը: Քաղաքական հաշիվներից բխող յուրաքանչյուր քայլի արդյունքում մենք կունենանք թե՛ ներքին քաղաքական ձախողումներ, թե՛ նաեւ արտաքին քաղաքական: Իսկ դա արդեն Հայաստանի ազգային անվտանգության խնդիր է եւ Հայաստանի շահերի դեմ է, ուստի Երկրապահը չի կարող ներգրավված լինել դրա մեջ»։
Այսպիսով՝ որն է այս խուճուճ, երկար-բարակ, ցաքուցրիվ հայտարարության բուն նպատակը, անշուշտ՝ այն, որ բռնեն երկրապահների վախը, եւ նրանք այսուհետ չկարողանան քննադատական խոսք ասել: Իսկ վերջին օրերին, հենց Հայելի ակումբում մի շարք ազատամարտիկներ, որոնք նաեւ երկրապահ են, հայտարարել են միավորվելու եւ կարճ ժամանակում երկիրը Նիկոլ Փաշինյանից ու իր իշխանությունից ազատելու մասին: Այլ հայտարարություններ էլ են հնչել, որոնք բնավ իշխանության շահերից չեն բխում: Առանց այն էլ իշխանությունը ծանր օրեր է ապրում, կորոնավիրուսի դեմ ձախողված պայքար, ընդդիմադիրների ակտիվացում, համախմբման հեռանկար եւ իշխանափոխության պահանջ, այսքանից հետո նոր գլխացավանք հեչ պետք չէ: Հետեւաբար, իշխանությունները գտել են բանալին եւ Սասուն Միքայելյանի բերանով սպառնում են իրական պատերազմ անցած մարդկանց, թե չխոսեք մեր մասին, մեզ չքննադատեք, հակառակ պարագայում կհեռացնենք ԵԿՄ-ից: Երբ Մանվել Գրիգորյանից հետո Սասուն Միքայելյանը զավթեց նրա աթոռը, իշխանությունները մեծամեծ խոստումներ էին տալիս, թե կառույցն այլևս երբեք իշխանության կցորդը չի դառնալու, չի սպասարկելու իշխանության շահերին, կյանքը ցույց տվեց, որ ոչ միայն հին ավանդույթները շարունակվում են, այլ իշխանությանը չծառայողներին կառույցի ղեկավարությունը շանտաժ է անում, որ կհեռացնեն ԵԿՄ-ից:
Անի Սահակյան
Հետևեք մեզ Viber-ում
