Արտակարգ նշանակումներ. Նիկոլ Փաշինյանը կանխատեսել է իր հեռացումը

Ուժային բլոկի համատարած կադրային փոփոխությունները արտակարգ դրության պայմաններում իրավամբ պետք է որ արտակարգ պատճառներ ունենային: Հատկանշական է, որ ԱԱԾ պետի, ոստիկանապետի և գլխավոր շտաբի պետի պաշտոնանկություններն ու նրանց փոխարեն Նիկոլ Փաշինյանի անձնական վստահության և մտերմության տիրույթում գտնվող կադրերով փոխարինումը հաջորդեց Գագիկ Ծառուկյանի և Արթուր Վանեցյանի հայտնի հայտարարություններին: Ինչպես հայտնի է, ԲՀԿ քաղաքական խորհրդի նիստում կուսակցության առաջնորդ Գագիկ Ծառուկյանը հայտարարեց, որ կառավարությունը 100 տոկոսով տապալել է համավարակի դեմ պայքարը և իր ամբողջ կազմով պետք է հրաժարական տա:
Ծառուկյանից հետո Նիկոլ Փաշինյանի հրաժարականը պահանջեց նաև ԱԱԾ նախկին պետ Արթուր Վանեցյանը` իր հիմնադրած Հայրենիք կուսակցության առաջին համագոււմարի ժամանակ: Այս հայտարարություններին հաջորդած ուժային բլոկի պաշտոնյաների համատարած պաշտոնանկությամբ թերևս Նիկոլ Փաշինյանը փորձում է կանխել հեղաշրջումը: Սա հասկանալի է: Ակնհայտորեն Փաշինյանն ունի մտավախություն, որ իրադարձությունների զարգացումը իսկապես կարող է հասնել նոր հեղափոխության կամ, ինչպես ինքը կասեր, հակահեղափոխության: Կադրերը, որոնց Նիկոլ Փաշինյանը ուղարկել է հեղափոխության առաջին գիծ, երկու ճանապարհ ունեն, նրանք կա'մ դառնալու են Նիկոլ Փաշինյանի մահապարտները, կա'մ էլ համակարգի հետ անհաշտ պայքարում ինչ-որ պահից սկսած տապալվելու են: Ամեն դեպքում, նրանց հեշտ ճակատագիր չի սպասվում:

Ներկայացնելով ԱԱԾ նորանշանակ տնօրեն Արգիշտի Քյարամյանին՝ Նիկոլ Փաշինյանը նրան հաջողություն է մաղթել .«Ուզում եմ ընդգծել, որ, իհարկե, ԱԱԾ-ն ուժեղ, կայացած, դինամիկ կառույց է, բայց պետք է արձանագրենք նաև, որ մարտահրավերները և դրանց արձագանքելու տեմպը, արագությունը, որակն անընդհատ բարելավվելու և բարեփոխվելու, լավարկվելու կարիք ունեն: Պարոն Քյարամյանի առաջ ես հենց այդ խնդիրն եմ դրել, որպեսզի ԱԱԾ-ն ավելի էֆեկտիվ կարողանա արձագանքել այն մարտահրավերներին, որոնք մենք ունենում ենք անվտանգության ոլորտում: Ընդ որում՝ անվտանգություն ասելով – և այդ հասկացության նշանակությունը ժամանակի ընթացքում փոխվում է – ի հայտ են գալիս նոր մարտահրավերներ, որոնք նախկինում գուցե ընդհանրապես կանխատեսված չէին՝ սկսած ընթացիկ ամենամեծ խնդրից՝ կորոնավիրուսի համավարակից, շարունակած տեղեկատվության անվտանգության, քաղաքական անվտանգության և մնացած բոլոր խնդիրներով՝ կոռուպցիայի դեմ պայքարի, կոռուպցիոն գործերի քննության որակի և դինամիկայի հետ կապված: Այդ հարցերը պետք է լուծենք»:

Վարչապետը նկատել է՝ երկու տարին բավարար ժամանակ էր, որպեսզի ԱԱԾ բոլոր աշխատակիցները դիրքավորվեն ոչ բռնի, թավշյա, ժողովրդական հեղափոխության, այսինքն՝ ժողովրդի իշխանության և նրա արժեքների նկատմամբ: Հիմա պետք է ամփոփել, թե տրված հնարավորությունն ով ինչպես է օգտագործել, և այս առումով պետք է հնչեն շատ կոնկրետ պատասխաններ. «2018 թվականին ՀՀ վարչապետի պաշտոնն ստանձնելով՝ ինձ համար կարևորագույն խնդիր է եղել հատկապես այնպիսի կառույցներում, ինչպիսին ԱԱԾ-ն է, ուժային մարմիններն են, ապահովել համակարգերի կայունությունը, չանել անկանոն գործողություններ և շարժումներ և ստեղծել հնարավորություններ, որպեսզի բոլորը, ովքեր ունեն դրա մղումը և ձգտումը, ադապտացվեն և դիրքավորվեն նոր իրողությունների նկատմամբ: Եվ հիմա, ինչպես ասում են, եկել է արդյունքներն ամփոփելու ժամանակը»:

Ծանր է լինելու հատկապես ԱԱԾ պետ Արգիշտի Քյարամյանի գործը, որը ընդհանրապես համակարգի ներկայացուցիչ չէ և լրջագույն խնդիր կունենա կադրավիկ ԱԱԾ-ականներին կառավարելու հարցում: Մեկ ամսում ստացած գնդապետի կոչումն այս հարցում հազիվ թե նրան օգնի: Եթե անգամ Քյարամյանն ունի շատ բարձր անձնային հատկանիշներ, միևնույնն է, համակարգն ու նրա աշխատելու տրամաբանությունը, գրված ու չգրված օրենքները այլ բան են: 30 տարին չբոլորած անփորձ երիտասարդի գործունեությունը ԱԱԾ համակարգում կարող է ճակտագրական լինել առաջին հերթին պետության, ապա նաև իշխանության և Նիկոլ Փաշինյանի համար: Երբ Քյարամյանը նոր էր տեղափոխվել, տեղեկություններ հրապարակվեցին, թե Փաշինյանը նրան ԱԱԾ է գործուղել, որ անցանկալի արտահոսքերի դեմն առնի: Սա դժվարին խնդիր է, որովհետև վերջին մեկ ամսում Փաշինյանին անհանգստացող արտահոսքերի խնդիրը կարծես թե լուծված չէ:
Վատիկանում նախկին դեսպան Միքայել Մինասյանը շարունակում է նույն տեմպով պետական անվտանգության հարցերին առնչվող բացառիկ տեղեկություններ հրապարակել: Հնարավոր է, որ Քյարամյանը բացարձակ իշխանություն է պահանջել իր առջև դրված խնդրի լուծման համար: Եթե անգամ այդպես է, ապա ուտեչկաների դեմն առնելու համար պետք է ԱԱԾ բարձրաստիճան ուսադիրներ կրողներից շատ մեծ հատվածին հեռացնել: Երկրորդ`ԱԱԾ միակ և գերակա խնդիրը անցանկալի ուտեչկաներով զբաղվելը չէ: Կան պետական կարևորության բազմաթիվ հարցեր, որոնք զուտ մասնագիտական և հետախուզական մոտեցում են պահանջում: Փորձի պակասն այստեղ անպայման զգացվելու է: Քյարամյանի նշանակման հետ կապված մեկ այլ խնդիր ևս կա` հնարավոր է, որ Նիկոլ Փաշինյանը կանխատեսել է իր հեռացումը և ուզում է վստահելի մարդ ունենալ` իր հետքերը մաքրելու համար:

Հայկ Դավթյան