Եթե Նիկոլ Փաշինյանը վարակված է կորոնավիրուսով, ուրեմն նվազագույնը կառավարության կեսը վարակված է․ երկրում ճգնաժամ է ստեղծվելու․ Նարեկ Սամսոնյան. Տեսանյութ
Նիկոլ Փաշինյանը Հայոց պատմության մեջ մնալու է միֆական առասպելական կերպար՝ լինելով ստի ու կեղծիքի խորհրդանիշը։ Այս մասին Արմնյուզ ՀԸ՝ Անժելա Թովմասյանի հեղինակային «Հայելու առաջ» հաղորդման ժամանակ ասել է «Քաղաքացիական գիտակցություն» ՀԿ նախագահ Նարեկ Սամսոնյանը։
Անդրադառնալով վարչապետի ու իր ընտանիքի՝ կորոնավիրուսով վարակված լինելուն՝ Նարեկ Սամսոնյանն ասել է․ «Ես ունեմ բոլոր հիմքերը կասկածելու, որ Նիկոլ Փաշինյանն ու իր ընտանիքը իրականում չեն վարակվել կորոնավիրուսով։ Այսպիսով, եթե ինքը պնդում է, որ վարակված է, ուրեմն նվազագույնը կառավարության կեսը վարակված են ու երկրում ստեղծվելու է ճգնաժամ»։
Ըստ Նարեկ Սամսոնյանի, եթե Կառավարությունից վարակված չլինի, ուրեմն Նիկոլ Փաշինյանը վարակված չէ․ «Կասկածիս երկրորդ պատճառն այն է, որ Նիկոլ Փաշինյանը փորձում է խուսափել պատասխանատվությունից։ Բժիշկները կասկածներ են հայտնում, որ առաջիկայում օրական ունենալու ենք հարյուրավոր մահեր, հետևաբար՝ այս շրջանը նրա համար ձեռնտու է լինել վարակված»։
Հաղորդման մյուս հյուրը՝ բիզնես խորհրդատու Արեն Ապիկյանը պատճառ չի տեսնում չհավատալու, որ Նիկոլ Փաշինյանը կորոնավիրուսով վարակված չէ․ «Եթե այդպես է, ապա Փաշինյանին շուտափույթ առողջություն եմ մաղթում»։
Դիտարկմանը՝ ինչո՞ւ հանրության մեջ կասկածներ կան, որ վարչապետը վարակակիր է, Արեն Ապիկյանը պատասխանել է․ «Քանի որ Նիկոլ Փաշինյանն այնքան է սուտ ասել, մարդիկ դրա համար էլ չեն հավատում։ Բայց ես չէի ցանկանա այս հարցի շուրջ մանիպուլյացիաներ լինեն»։
Արեն Ապիկյանի խոսքով՝ քանի որ արդեն երկրի առաջին դեմքն է վարակված, ստացվում է՝ կառավարության կանխարգելիչ քայլերն այնքան ապարդյուն էին, որ մենք խիստ սահմանափակումները հանելով՝ ունենք վարակակիրների թվի աճ։
Նարեկ Սամսոնյանը սխալ է համարում, որ վարակի տարածման մեջ մեղադրում են քաղաքացիներին, ովքեր չեն հետևում Պարետատան պահանջներին․ «Ի՞նչ եք ուզում՝ Նիկոլ Փաշինյանը պինցետով ու տնական օղիով էր պայքարում վիրուսի դեմ, իսկ Արսեն Թորոսյանն ասում էր՝ Կորեայից նոր եմ վերադարձել, ու բոլորին վարակելու եմ։ Այս մարդիկ ձեռք էին առնում։ Ու այսօր սահմանափակումներին չեն հետևում մարդիկ, ովքեր այս իշխանության մոլի երկրպագուներն են»։
Արեն Ապիկյանի խոսքով՝ պատասխանատու ղեկավարը պետք է իր սխալների համար նախ ներողություն խնդրի․ «Սա աննախադեպ ճգնաժամ է, ու աշխարհի բոլոր երկրներում են սխալներ եղել, բայց այսօր, Նիկոլ Փաշինյանն անգամ չի փորձում ներողություն խնդրել»։
Հետևեք մեզ Viber-ում
