Նոր ապտակ Մոսկվայից

Հայաստանի հետ հարաբերությունները մենք գնահատում ենք որպես դաշնակցային, տեսակոնֆերանսի ձևաչափով ՀԱՊԿ Արտաքին գործերի նախարարների խորհրդի նիստից հետո տեղի ունեցած ճեպազրույցում երեկ հայտարարել է Ռուսաստանի արտգործնախարար Սերգեյ Լավրովը:

«Եվ սա վերաբերում է հարաբերություններին ՀԱՊԿ շրջանակներում և մեր երկկողմ հարաբերություններին: Ռազմական համագործակցությունը շատ, շատ սերտ է», - ասել է Լավրովը:

«Դուք գիտեք, որ Հայաստանում կա ռուսական ռազմաբազա, որն նպաստում է տարածաշրջանում կայունության ու անվտանգության ապահովմանը: Ինչ վերաբերում է ռազմատեխնիկական համագործակցությանը, ռազմատեխնիկական օգնությանը, որը մենք տրամադրում ենք Հայաստանի Հանրապետությանը, այստեղ մենք նույնպես հաստատել ենք սերտ և կառուցողական աշխատանք: Այս աշխատանքը մշտական, ամենօրյա և մասնագիտական է: Այնպես որ, այստեղ ոչ մի խնդիր չի ծագում», - ասել է նա:

Ռուսական կողմից արձանագրային ձևով արված այս հայտարարությունն ընդամենը ստանդարտ հայտարարություն է: Խորքային առումով՝ բացի ռուսական ռազմաբազայի ներկայությամբ պարտավորությունները, Հայաստանի հետ հարաբերությունները՝ որպես դաշնակցային, հնարավոր չէ գնահատել:

Եվ դեռ հարց է, եթե Հայաստանում չլիներ ռուսական ռազմաբազա՝ ինչ մնացած կլիներ հայ-ռուսական հարաբերություններից:

Իսկ որ հայ-ռուսական հարաբերություններում քաղաքական-տնտեսական առումով հետընթաց է ու նկատելի սառնություն, արդեն բոլորի համար ակնհայտ է:

Վերջին շաբաթներին՝ Հայաստանի իշխանությունը ռուսական գազի գնի փոփոխության հարց բարձրացրեց, ի վերջո այդ դժգոհություններին պատասխանեց անձամբ Պուտինը բավական կոշտ ու հստակ՝ մերժելով Փաշինյանի ու Լուկաշենկոյի գնահատականները:
Եվ երեկ ռուսական և վրացական աղբյուրներից տարածվեց բավական ուշագրավ մի տեղեկություն: Պաշտոնական Թբիլիսին հայտարարեց, որ թարմացրել է ռուսական «Գազպրոմի» հետ համաձայնագիրը` առավել շահավետ պայմաններով:

Մասնավորապես, ըստ Էկոնոմիկայի նախարար Նաթիա Տուրնավայի, ռուսական կողմը համաձայնել է գինը իջեցնել մոտ 15 տոկոսով: «Հաշվի առնելով ոլորտում աճող մրցակցությունը, ինչպես նաև միջազգային շուկայում նավթամթերքի գնանկումը՝ մենք վերանայեցինք գործող պայմանագիրը», - ըստ վրացական լրատվամիջոցների, ասել է Տուրնավան:

Հստակ թվեր նախարարը չի նշել` պնդելով, թե դա կոմերցիոն գաղտնիք է, սակայն հավաստիացրել է, որ գազը կէժանանա մոտ 15 տոկոսով:

Նկատենք, որ Վրաստանը տարիներ շարունակ` 2006-2019 թվականներին, հրաժարվում էր ռուսական գազից` նախընտրելով վառելիքը գնել Ադրբեջանից:

Այժմ, երբ Հայաստանն ու Բելառուսը, որոնք Ռուսաստանի ռազմավարական գործընկերներն են, բարձրաձայնեցին գազի գնի բարձր լինելու մասին և հիմնավորեցին իրենց դժգոհությունը համավարակով ստեղծված իրավիճակով՝ ռուսական կողմը փաստորեն Վրաստանի հետ հարաբերությունները 2008թ. հնգօրյա ռուս-վրացական պատերազմից հետո խզած լինելով այսօր արդեն գազային գործարք է կնքում: Եվ հատկանշական է, որ Թբիլիսին դա համարում է շահավետ գործարք:

Ահա այն ամենը ինչ պետք է իմանալ դաշնակցային և սովորական գործընկերային հարաբերությունների մասին:

Մետաքսյա Շալունց