Գյուղացիների փողերը կերել են պարգևավճար ստացողները.Սոնա Աղեկյան (video)

Հրաչ Բերբերյանը, Անժելա Թովմասյանի «Հայելու առաջ» հաղորդմանը, խոսելով գյուղատնտեսական ոլորտի ու գյուղացու խնդիրների մասին, ասել է. «Խեղկատակությունը նրան է հասել, որ ապրիլին խոսում են գյուղատնտեսական վարկերի մասին և միայն այսօր են ուզում դա իրականացնել: Բանկերի մոտ սարսափելի հերթեր են ու վստահ եմ՝ գյուղացիների մեծ մասը չեն էլ ստանալու այդ վարկերը»:

Հրաչ Բերբերյանի խոսքով՝ իշխանությունը մատների արանքով է նայում գյուղատնտեսական ոլորտին:

Հարցին՝ ինչպե՞ս կարգավորել, որպեսզի յուրաքանչյուր գյուղացի կարողանա այս պայմաններից ելնելով վարկեր ստանալ, Հրաչ Բերբերյանը պատասխանել է. «Ասել եմ ու ասում եմ՝ գյուղը քայքայել են բանկերը: Պարոն թանկագին վարչապետ, Դուք գյուղացու անվան տակ բանկերն ե՞ք հարստացնում»:

Սոնա Աղեկյանն էլ ահազանգում է, որ մեր գյուղացիներն արտագաղթում են, «Մեր գյուղացիները քարից հաց քամող են: Սակայն, երբ գյուղացին թղթեր հավաքելով գալիս է բանկ ու բանկը մերժում է նրան վարկ տրամադրել՝ փոխարենը տրամադրում է ֆերմերին, գյուղացին հիասթափվում ու բռնում է արտագաղթի ճանապարհը»:

Սոնա Աղեկյանի համոզմամբ՝ եթե Նիկոլ Փաշինյանը ցանկանում է, որ երկրում առաջընթաց լինի, պետք է գյուղացու համար ամեն ինչ դառնա մատչելի. «Նաև գյուղացու շնորհիվ է, որ այսօր Նիկոլ Փաշինյանն իշխանության է ու կարողանում է բյուջեն թալանել»: