Ալիևը՝ ծանր հոգեվիճակում. Նա «կռիվ» է տալիս բոլոր ճակատներում

Մայիսի 18-ից 22-ն ադրբեջանական բանակը լայնամասշտաբ օպերատիվ-մարտավարական զորավարժություններ է անցկացնելու: Ինչպես հաղորդել են ադրբեջանական ԶԼՄ-ները՝ վկայակոչելով Ադրբեջանի ՊՆ-ի հայտարարությունը, զորավարժություններն անցկացվում են Ադրբեջանի նախագահ Իլհամ Ալիևի կողմից հաստատված ծրագրով:

Տեղեկատվության համաձայն՝ զորավարժություններին մասնակցելու է մինչև 10 հազար զինծառայող, շուրջ 120 միավոր տանկ և զրահատեխնիկա, մինչև 200 հրթիռահրետանային համակարգ, ականանետեր, բանակային ավիացիայի մինչև 30 միավոր նմուշ, ինչպես նաև տարբեր նշանակության անօդաչու թռչող սարքեր:

Նշվում է նաև, որ զորավարժությունների ժամանակ կմշակվեն մարտական պատրաստվածության, գործողությունների համակողմանի պլանավորմանն առնչվող, ինչպես նաև զորքերի տարբեր ստորաբաժանումների ղեկավար խմբերի համագործակցությանը վերաբերող հարցեր, կստուգվեն ստեղծված հարվածային խմբերի կրակային և մանևրելու կարողությունները: Ըստ ադրբեջանական գործակալությունների հաղորդագրությունների՝ «ադրբեջանական բանակը կմշակի հարվածների տարբերակներ՝ հայկական զորքերի խոր թիկունքին»:

Այսպես, Ադրբեջանը անցնում է լայնամասշտաբ օպերատիվ-մարտավարական զորավարժությունների անցկացման: Ինչպես երեկ հայտնի դարձավ, ադրբեջանական մարտական հենակետերից խոշոր տրամաչափի զենքերից կրակ էր արձակվել Տավուշի մարզի Բերքաբեր գյուղի ուղղությամբ, ինչի հետևանքով վնասվել են բնակելի տներ։ Հակառակորդի կրակակետերի ուղղությամբ հայ դիրքապահների ձեռնարկած համապատասխան գործողությունների արդյունքում հակառակորդը լռեցվել է։

Ադրբեջան, ինչպես երևում է, անցնում է ընդդեմ Հայաստանի լուրջ ճնշման՝ քարոզչական դաշտում, ինչպես նաև սահմաններում որոշակի լարվածության ստեղծմամբ ու բանակցային գործընթացի նկատմամբ որոշակի աշխատանքներ է իրականացնում:
Սա ունի իհարկե ներքին պատճառներ: Ադրբեջանում բավական ծանր սոցիալ-տնտեսական իրավիճակ է: Արդեն մի քանի բանկեր փակվել են՝ կորոնավիրուսի համավարակի պայմաններում:

Ալիևը զբաղված է իշխանություն պահելով, և ստեղծված իրավիճակի համար մեղավորների փտնտրտուքով: Եվ այս համատեքստում բոլոր ճակատներում է «կռիվ տալիս»՝ ներքաղաքականից մինչև արտաքին քաղաքական:

Ալիևյան ռեժիմի «հոգեվիճակը» նկատեցին ԱՄՆ-ի կոնգրեսում:

Ադրբեջանն օգտագործում է կորոնավիրուսի վարակը որպես պատրվակ երկրում քաղաքական ճնշումներ իրականացնելու և խոսքի ազատությունը սահմանափակելու նպատակով, օրերս հայտարարեցին Միացյալ Նահանգների Կոնգրեսի Մարդու իրավունքների հարցերով Հելսինկյան հանձնաժողովի համանախագահներ կոնգրեսական Ալսի Հասթինգսը և սենատոր Ռոջեր Ուիքերը:

«Այս համավարակի ընթացքում առողջապահությանն ուղղված միջոցները որևէ կերպ չեն արդարացնում քաղաքական բռնաճնշումները: Մենք անհանգստացած ենք զեկույցներով, որոնք վկայում են, որ Ադրբեջանի կառավարությունն ավելի է սահմանափակում սեփական քաղաքացիների ազատ արտահայտման, ազատ մամուլից օգտվելու և տեղեկատվության իրավունքը՝ իրականացնելով ձերբակալություններ, տուգանքներ, բռնություններ և, հնարավոր է, խոշտանգումներ: Երկրի իշխանությունները պետք է դադարեցնեն, այս գլոբալ ճգնաժամի պատրվակով սահմանափակել Ադրբեջանի Ժողովրդական ճակատ կուսակցության անդամների և այլ գործիչների և թղթակիցների ազատ խոսքի իրավունքը»:

ԱՄՆ-ի Կոնգրեսի հանձնաժողովի հայտարարության մեջ նշվել է նաև, որ վերջին շաբաթների ընթացքում Ադրբեջանի իշխանություններն ազատազրկել, հարցաքննել և տուգանել են, իսկ մեկ դեպքում հնարավոր է խոշտանգումների ենթարկել ընդդիմադիր գործիչների և լրագրողների:

Մետաքսյա Շալունց