Սերժ Սարգսյանի «ձիով» քայլը. նա ապահովագրեց իրեն

Այսօր Ծառուկյան դաշինքի 12 պատգամավորներ դիմում էին գրել ԿԸՀ՝ պահանջելով չեղյալ անել մանդատից հրաժարվելու վերաբերյալ նրանց նախորդ դիմումները, պնդելով, որ իրենք տեղյակ չեն եղել դրա բովանդակությանը: Նրանցից 8-ի դիմումները ԿԸՀ-ն բավարարել է, եւ նրանք մանդատներ կստանան: Խոսքը Վահան Կարապետյանի, Արտյոմ Ծառուկյանի, Խաչիկ Մանուկյանի, Նապոլեոն Ազիզյանի, Հարություն Կարագյոզյանի՝ Կարամելի Հարութի, Սերգեյ Բագրատյանի, Արթուր Մանուկյանի եւ Արարատ Զուրաբյանի մասին է։ Բացի նրանից եւս չորսը հետ են վերցրել իրենց անունից գրված դիմումները՝Մանուկ Սուքիասյանը, Մուշեղ Սաղաթելյանը, Հրանտ Դավթյանը եւ Ալիկ Եղիկյանը։ Երեկ ինքնաբացարկ ներկայացնելու վերջնաժամկետին նշված բոլոր թեկնածուները 23 հոգու շարքերում էին, որոնց համար դիմումներ են ներկայացվել ԿԸՀ։ Որեւէ մեկը չէր սպասի, որ կգտնվեր գեթ մի թեկնածու, ով կըմբոստանար Ծառուկյանի կայացրած որոշման դեմ։ Բոլոր թեկնածուները ընտրություններից հետո անհետացել էին, չէին համարձակվում որեւէ մեկնաբանություն տալ այս առիթով, բայց այսօր հանկարծ բոլորը հայտնվեցին ու միասնաբար գրոհեցին ԿԸՀ-ն՝ վերականգնելով ոտնահարված իրավունքները։ Իսկ այդպիսի համարձակություն նրանց կարող էր միայն մեկ մարդ թույլատրել՝ Սերժ Սարգսյանը, որին ձեռնտու է ստեղծված իրավիճակը։ Կասկածից վեր է, որ Ծառուկյանի դեմ ըմբոստացած թեկնածուները նոր ձեւավորվող խորհրդարանում գործելու են Սերժ Սարգսյանի հովանու ներքո։ Վերջին օրերին մամուլը գրում էր, որ Ծառուկյանը Սերժ Սարգսյանի հետ համաձայնեցնում է խմբակցության կազմը ու ՀՀ նախագահի վերջնական խոսքով է յուրաքանչյուրի համար որոշում կայացնում։ Բայց այսօրվա իրադարձությունները ցույց են տալիս, որ Սերժ Սարգսյանը որոշել է իրեն լիովին ապահովագրել։ Մենք արդեն մի քանի անգամ անդրադարձել ենք մինչեւ 2018 թվականը ապագա խորհրդարանում սպասվող մի շարք բախտորոշ քվեարկությունների հարցին՝ սկսած Ղարաբաղի կարգավորման հարցից, վերջացրած 2018-ին վարչապետի թեկնածուի ներկայացման, ուստի Սերժ Սարգսյանը բացարձակ մեծամասնության է ապահովում խորհրդարանում, որպեսզի զերծ մնա անկանխատեսելի իրավիճակներից։ Այսօրվա իրադարձությունները կարելի է նաեւ դիտարկել նախորդ խորհրդարանի զարգացումների որպես հետեւանք, երբ ինչ-որ պահից Սերժ Սարգսյանի միջամտությամբ ԲՀԿ-ից փաստացի անջատվեց ՀՀԿ ղեկավարի կողմից ներդրված պատգամավորների խումբը ու , մասնավորապես, փետրվարյան իրադարձություններից հետո այդ խումբը բացահայտ գործեց հանուն ՀՀԿ-ի։ Հիմա Սերժ Սարգսյանը այդ ամենը անում է մինչեւ նոր խորհրդարանի ձեւավորումը։ Հիմա առավել քան հասկանալի է Խաչիկ Մանուկյանի խոսքերի ճշմարտացիությունը, ՀՀԿ-ական Մանուկյանը վերջին պահին հայտնվեց Ծառուկյան դաշինքում ու պարզաբանեց, որ այնտեղ է, որովհետեւ ՀՀԿ-ում տեղ չկար։ Իհարկե, նրա դեպքում մանդատը հետ ստանալն արդարացված է, քանի որ նա իր Արագածոտնի մարզում ամենաշատ ձայն ստացած թեկնածուն է, բայց փոքր-ինչ անհասկանալի է Արարատ Զուրաբյանի, Սերգեյ Բագրատյանի պարագան։ Նրանց հետ նախնական խոսակցություն էր եղել, որ խորհրդարան են անցնելու պայմանավորված թվով ձայն բերելու դիմաց, բայց ընտրությունների արդյունքներից հայտնի դարձավ, որ երկու թեկնածուները չեն արդարացրել խոստումները, այդուհանդերձ այսօր պարզ երեսով ներկայացել են ԿԸՀ ու պահանջել իրենց մանդատները, որովհետեւ համամասնական ցուցակի անցողիկ հորիզոնականներում են գտնվում։ Ծառուկյան դաշինքի մանդատից հրաժարված մյուս թեկնածուները չեն պայքարել իրենց իրավունքների համար, թեպետ նրանցից միայն մեկն է, որ մանդատ էր ստացել թիվ 1 ընտրատարածքից, խոսքը ազգությամբ եզդի Արթուր Մամոյանի մասին է։ Անի սահակյան