Փաստաթղթում «ես հրաժարվում եմ մանդատից» ձևակերպում չի եղել. Բագրատյան

ԿԸՀ ներկայացած՝ Ծառուկյան դաշինքի ներկայացուցիչները՝ 11 հոգի, հայտարարում են, որ իրենք մանդատ չստանալու դիմում չեն ներկայացրել ԿԸՀ, այլ իրենց փոխարեն դա արել է Ծառուկյան դաշինքը։ 4000-ից ավելի ձայն հավաքած Սերգեյ Բագրատյանը եւս հայտարարեց, որ ինքնաբացարկի դիմում չի ներկայացրել. նա բացահայտեց, թե ինչպես է իրենց ստորագրությունները հայտնվել այդպիսի փաստաթղթի տակ։ Սերգեյ Բագրատյանը չի կարծում, թե առանց իրենց իմացության ինքնաբացարկի դիմումներ ներկայացանելը դաշինքի ներսում ճգնաժամի մասին է խոսում: «Սա խոսում է պետության կայացման ընթացքի մասին: Այսինքն՝ որ մարդիկ համարձակորեն պաշտպանում են իրենց քվեն: Ժողովրդի կողմից ստացված քվեն չի կարելի մատնել անուշադրության, և ոչ ոք այդ իրավունքը չունի: Եթե քվեն ստացել ես, մինչև վերջ պետք է պաշտպանես այն», - այսօր ԿԸՀ-ում լրագրողների հետ ճեպազրույցում հայտարարեց Սերգեյ Բագրատյանը: Նա հստակեցրեց, որ ինքը և մյուսները ստորագրել են մի փաստաթղթի տակ, որը ենթադրում է ինքնաբացարկ մինչև ընտրությունները՝ «Ծառուկյան» դաշինքի համամասնական ցուցակից: Բայց դա գործում է մինչև ընտրությունների օրը, իսկ արդեն ընտրություններից հետո այլ իրավիճակ է,ասաց նա: «Մեր ստորագրած փաստաթղթում «ես հրաժարվում եմ մանդատից» ձևակերպում չի եղել», - նշեց Բագրատյանը: Արդյո՞ք ԱԺ մտնելու պարագայում կհամագործակցի դաշինքի պատգամավորների հետ, նշեց՝ դա կախված է նրանից, թե հարցը դաշինքում ինչպես կմեկնաբանվի։