«Ծառուկյան» դաշինքի 11 ներկայացուցիչները հրաժարվեցին ինքնաբացարկի դիմումից
ԿԸՀ ներկայացած՝ Ծառուկյան դաշինքի ներկայացուցիչները՝ 11 հոգի, հայտարարում են, որ իրենք մանդատ չստանալու դիմում չեն ներկայացրել ԿԸՀ, այլ իրենց փոխարեն դա արել է Ծառուկյան դաշինքը։ Ընտրված պատգամավոր Մուշեղ Սաղաթելյանը լրագրողների հետ զրույցում նման դիմումների ներկայացնելը առանց իրենց գիտության հանցագործություն համարեց: Սերգեյ Բագրատյանի խոսքով, դա անհարգալից վերաբերմունք էր իրենց նկատմամբ: «Մեզ հետ չեն խոսել, ու դա իրավունք է տալիս, որ մենք էլ չխոսենք իրենց հետ: Փորձել ենք խոսել Ծառուկյանի հետ, չի ստացվել», - ասաց նա: Ծառուկյան դաշինքի թեկնածուն ասաց, որ թեկնածություն առաջադրելիս իրենց առաջարկել են ստորագրել մի փաստաթղթի տակ, ըստ որի՝ իրենք ինքնաբացարկ են հայտնում, սակայն, ըստ իրեն, դա ոչ թե հիմա պետք է օգտագործվեր, այլ այն պարագայում, որ եթե ինքը լիներ գործուղման մեջ, չկարողանար վերադառնալ հանրապետություն, այդ պարագայում դաշինքն իր դիմումը կներկայացներ ԿԸՀ և իր փոխարեն այլ պատգամավոր կներկայացվեր։ Նապոլեոն Ազիզյանի ներկայացուցիչը եւս պնդեց, որ Ազիզյանը ինքնաբացարկի դիմում չի ներկայացրել, այդ մասին իմացել է լրատվությունից և մանդատը վերցնելու է։
Հետևեք մեզ Viber-ում
