« Աթեշյանը եկեղեցական առումով չունի որևէ օրինականություն». Մաշալյան
Ստամբուլի հայկական «Ժամանակ» օրաթերթը հայտնում է,որ Պոլսո Հայոց պատրիարքարանի կրոնական ժողովի ղեկավար Սահակ եպիսկոպոս Մաշալյանը հանդիպումներ է ունեցել պատրիարքական փոխանորդ Արամ արքեպիսկոպոս Աթեշյանի հետ,քննարկել են Աթոռի առկա խնդիրները և դրանց լուծման հեռանկարները: Մաշալյանը հայտնել է, որ պատրիարքի ընտրության մասին նախագահ Ռեջեփ Թայիփ Էրդողանի կողմից ապրիլի 24-ին արած ուղերձում առկա ակնարկը նոր հնարավորություն է այդ գործընթացը սկսելու համար: Պատրիարքարանը պետք է անմիջապես պատկան իշխանություններին տեղյակ պահի 2016 թվականի հոկտեմբերի 26-ին տեղի ունեցած Եկեղեցական համագումարի արդյունքների մասին, որով պատրիարք Մեսրոպ արքեպիսկոպոս Մութաֆյանը ճանաչվեց որպես «պատրիարք ի հանգստյան», իսկ պատրիարքական աթոռը համարվեց թափուր,ասել էնա: «Պետությանը պետք է տեղյակ պահվի այդ որոշման մասին, պետք է ներկայացվի Մութաֆյանի առողջական վիճակի մասին բժշկական մասնագիտական տեղեկագիրը: Քանի որ պետությունը իր համար որպես բանակցող է ճանաչում Արամ արքեպիսկոպոս Աթեշյանին, ես այցելեցի նրան: Խաղաղ զրույց տեղի ունեցավ, սակայն նա համոզված չէ, որ ներկա փուլում որևէ լուր պետք է տալ պետությանը կամ առհասարակ որևէ քայլ պետք է անել: Նման պայմաններում հավանաբար այդ դիմումը կանենք մենք: Այսինքն, Կրոնական ժողովը և Եկեղեցական համագումարը կարող են նամակ գրել և հանձնել նահանգապետարանին: Ընդունում եմ, որ այս ձևը որոշ վտանգներ է պարունակում, քանի որ պետությունը որպես բանակցող է ընդունում Աթեշյանին` իբրև պատրիարքական փոխանորդ: Եթե նամակի տակ չլինի նրա ստորագրությունը, ապա մեր նախաձեռնությունը կարող է որոշակի չափով վտանգվել: Բայցևայնպես, մենք հանձն ենք առնելու այս հավանականությունը, որպեսզի մեր ժողովուրդը հերթական անգամ տեսնի ու համոզվի, թե ով է խուսափում ընտրության համար դիմում ներկայացնելուց»,-նշել է Մաշալյանը: « Աթեշյանի հետ էլ պետք է կապի մեջ լինենք, և ես բացեցի այդ դուռը: Պետք է նրան ներքաշենք այս գործի մեջ: Նրա ներգրավմամբ պաշտոնական քայլեր կձեռնարկվեն, և այս ընտրության գործի առջև ճանապարհ կհարթվի:Մենք այժմ ունենք տեղապահ, ով չի կարող անցնել գործի, և փոխանորդ, ով եկեղեցական առումով չունի որևէ օրինականություն: Պետք է դուրս գանք այս վիճակից »,-ասել է Սրբազան Հայրը: «Գարեգին արքեպիսկոպոս Բեքչյանը վերջին անգամ Պոլսից բաժանվեց ծանր զգացումներով: Նա մեր պատրիարքական աթոռին կապված հոգևորական է և այս փուլում հստակություն է ակնկալում: Բեքչյանը Պոլիս պետք է գա այստեղից դրական լուրեր առնելուց հետո: Այլապես այս իրադրությունն ամոթալի է և անհարմար: Մենք նրան ասում ենք, որ իբրև ընտրյալ տեղապահ մեր գլխի վրա տեղ ունի, սակայն մյուս կողմից իր նկատմամբ ցուցաբերված վերաբերմունքն իսկապես վիրավորական է: Մեր համակարգը կաթվածահար է եղել»: Պոլսո Հայոց պատրիարքարանի կրոնական ժողովի ղեկավարն ընդգծել է, որ իր հարաբերություններն Աթեշյանի հետ միշտ կարող են բարելավվել, քանի որ նրա հետ անձնական խնդիր չունի:
Հետևեք մեզ Viber-ում
