Տարոն Մարգարյանն ուշացել է գնացքից. Փոստանջյան

«Երկիր Ծիրանի» կուսակցությունը նախընտրական քարոզարշավ է իրականացնում Սարի թաղում։ Կուսակցության ղեկավար և Երևանի քաղաքապետի թեկնածու Զարուհի Փոստանջյանի համոզմամբ՝  թեև Սարի թաղը ոչ բարեկարգված համայնք է, բայց այնտեղի բնակիչներն ունեն հստակ քաղաքացիական դիրքորոշում: «Սարիթաղցին այն մարդը չէ, որ ճնշման ներքո գնա ընտրության, ես չեմ հավատում դրան: Այդ քաղաքացիական դիրքորոշումը նրանք ցույց տվեցին ամենադժվարին պահին, երբ Երևանում տեղի էին ունենում բողոքի գործողություններ։ Սարիթաղցիներն իրենց համերաշխությունը հայտնեցին և մեզ պաշտպանեցին բռնությունից»,- ասաց նա: Լրագրողներից մեկի դիտարկմանը, թե Երեւանի քաղաքապետի ՀՀԿ-ական թեկնածու Տարոն Մարգարյանը հայտարարել է, թե ծանոթ չէ մյուս թեկնածուների նախընտրական ծրագրերին, Փոստանջյանը նշեց. «Տարոն Մարգարյանն ուշացել է գնացքից, իսկ մենք սիրում ենք Երեւանը, եւ մեր սերը դուրս է խաղի կանոններից: Տարոն Մարգարյանին հրաժեշտ ենք տալիս եւ ցանկանում, որպեսզի նա գործի եւ ապրի այլեւս իրավունքի գերակայության եւ օրենքի շրջանակներում»: Սարի Թաղի մանկապարտեզի կողքով անցնելիս՝ Փոստանջյանն անդրադարձավ նաև Երևանի մանկապարտեզների խնդրին. «Բազմաթիվ մանկապարտեզների շենքեր օտարվել են, շատ մանկապարտեզներ չեն համապատասխանում Երևանի բնակիչների պահանջներին, այսինքն՝ դրանք շատ քիչ են, ու նոր մանկապարտեզների կառուցման խնդիր ունենք»։