Եթե ոչնչացնեն Սիրիան...
Son dakika լրատվական կայքի փոխանցմամբ՝ քրդամետ «Ժողովուրդների դեմոկրատական» կուսակցության (ԺԴԿ) համանախագահ Սելահաթին Դեմիրթաշն այցելել է Հունաստան, ուր և հանդիպել է այդ երկրի վարչապետ Ալեքսիս Ցիպրասի հետ։ Հունաստանի վարչապետի գրասենյակի հաղորդմամբ՝ Ցիպրասի ու Դեմնիրթաշի երկկողմ հանդիպումը տևել է մոտ մեկ ժամ։ Հանդիպումից հետո լրագրողների հետ զրույցում Դեմիրթաշը հայտարարել է, որ հանդիպումն անցել է անչափ ջերմ մթնոլորտում։ Դեմիրթաշը մանրամասնել է, որ հանդիպման ժամանակ քննարկվել են Թուրքիայի զարգացումները, Սիրիայի պատերազմն ու փախստականների հոսքը, Եվրոպայի ներսում տիրող ընդհանուր դրությունը։ Դեմիրթաշը կարծիք է հայտնել, որ միջազգային հանրությունը հաջող չհանձնեց Սիրիայում խաղաղություն հաստատելու քննությունը։ Նա Սիրիական ճգնաժամի չկարգավորման համար քննադատել է թե՛ ԵՄ-ին, թե՛ Թուրքիայի կառավարությանը՝ նշելով, որ նրանք չկատարեցին իրենց դերակատարությունը։ Դեմիրթաշը Թուրքիայի իշխանություններին մեղադրել է Սիրիայի հարցում կանխակալ դիրքորոշման համար, ինչպես նաև հիշեցրել է, որ Թուրքիայի նախագահ Ռեջեփ Էրդողանն ու վարչապետ Ահմեդ Դավութօղլուն շարունակ մտահոգություններ են հայտնել Սիրիայի քրդերի բազմաթիվ հաջողությունների կապակցությամբ, սակայն մտահոգություն չեն հայտնել ԴԱԻՇ-ի կողմից խալիֆայություն հիմնելու կապակցությամբ և չեն ցուցաբերել ռազմական միջամտություն։ Դեմիրթաշն ընդգծել է, որ եթե վերջ տրվի Սիրիա պետությանը և ստեղծվի ԴԱԻՇ-ի պետությունը, ապա Դավութօղլուն, ամեն դեպքում, կդառնա ԴԱԻՇ-ի պետությունը ճանաչած առաջին երկրի վարչապետ։ Դեմիրթաշը նկատել է, որ քրդերն առաջխաղացումներ ունեն և տարածքները մաքրում են ԴԱԻՇ-ից, իսկ Թուրքիան դրան զուգահեռ պատերազմական նախապատրաստություններ է իրականացնում։
Հետևեք մեզ Viber-ում
