Ծեծկռտուքին մասնակցել է նաև Գագիկ Բեգլարյանի որդին. նոր մանրամասներ

hraparak.am-ին նոր մանրամասներ են հայտնի դարձել շաբաթ, լույս կիրակի գիշերը Տրանսպորտի ու կապի նախարար Գագիկ Բեգլարյանի թիկնապահների մասնակցությամբ տեղի ունեցած ծեծկռտուքի մասին: Այսպես, մեզ հասած տեղեկություններով՝ միջադեպին մասնակցել է նաեւ Գագիկ Բեգլարյանի որդին, իսկ տուժողն էլ 2 հոգի է՝ «Վենետիկյան պալատ» ռեստորանային համալիրի սեփականատիրոջ որդին՝ Սերգեյ Աբովյանը եւ նրա ընկերը: Տուժողի շրջապատից Hraparak.am-ին հայտնի դարձավ, որ մտերիմ մեկը Սերգեյին կանչել է Սարյանի փոստի մոտ, նա ընկերոջ հետ գնացել է այդտեղ: Հանդիպման հենց սկզբում մի քանի հոգի, առանց որեւէ խոսք ասելու, միանգամից հավաքվել են ու ծեծել երիտասարդներին: Մտերիմները ստույգ չգիտեն, թե վիճաբանության պատճառը որն է եղել, թեեւ սկզբից պնդում էին, որ հնարավոր է ճանապարհը չզիջելու խնդիր եղած լինի, բայց դա հստակ չէ, այժմ էլ ասում են, թե գուցե գումարային հարցեր լինեն: Պատմում են, թե նախարարի մտերիմներից մեկի հետ Սերգեյը ծանոթ է եղել, խնդիրներ են ունեցել, նախկինում եւս վիճաբանություն, ծեծկռտուք է եղել, սակայն ոչ այսքան դաժան: Թե ով էր այդ մտերիմը, եւս հայտնի չէ, մի մասը ասում է եղբոր փեսան, մյուսները նշում են՝ պարզապես հարազատ մարդ: Սարյանի փոստի մոտ տեսախցիկներ կան, եւ իրավապահները ցանկության դեպքում կարող են պարզել, թե կռվի մասնակիցների ինքնությունը, թե պատճառը: Տեղեկացանք նաեւ, որ միջադեպից հետո երիտասարդը տուն չի գնացել, գնացել է հոր «Վենետիկյան պալատը»: Ասում են, թե Սերգեյի քիթը ջարդվել է, ձախ աչքը՝ վնասվել, սակայն տարակուսելի է, որ նման վնասվածքներ ստանալուց հետո նա իրավապահներին չի դիմում, երեւի չի ուզում «գործ տվողի» անուն հանել: Մանրամասները hraparak.am-ում