Այս աղջիկները, հավանաբար, չէին ծնվելու. Արմեն Գալստյան
«Երեխայի սեռի խտրականության դեմ պայքարի փաստերի վրա հիմնված նախաձեռնությունները 2015-2017թթ.» ամփոփիչ համաժողովի ընթացքում Մարդկային զարգացման միջազգային կենտրոնի գործադիր տնօրեն Արմեն Գալստյանը տեղեկացրեց, որ 2017թ. հրապարակված պաշտոնական վիճակագրության տվյալներով` նորածինների սեռերի համամասնության շեղումը 2011թ. համեմատ կրճատվել է ավելի քան 40 տոկոսով: Նրա հաղորդմամբ իրենք կատարած ջանքերի շնորհիվ, (իրազեկման, խտրականությունն արմատից մերժելը և մարդու իրավունքների նկատմամբ հարգանքը), այսօր արդեն կարող է ասել, որ այս երեք տարիների յուրաքանչյուր օր կյանք է պարգևել մի աղջկա: «Ծրագրի իրականացման արդյունքում ավելի քան 1000 աղջիկ երեխա է լույս աշխարհ եկել` այն աղջիկները, ովքեր հավանաբար չէին ծնվելու: Առանց մեր համատեղ ջանքերի՝ սեռի խտրականության պրակտիկան յուրաքանչյուր տարի 1400-2000 աղջիկ երեխայի կյանքի հնարավորություն էր խլելու: Երեխայի սեռի ընտրության խտրականության հետևանքով համեմատաբար խաղաղ պայմաններում մեր երկիրն առաջիկա 3 տարիներին կարող էր կորցնել ավելի շատ կյանքեր, քան ղարաբաղյան հակամարտության ամենաթեժ տարիներին միասին վերցրած` աղջիկ երեխաների կյանքեր, և միայն՝ սեռի պատճառով»,- ասաց Արմեն Գալստյանը:
Հետևեք մեզ Viber-ում
