«Արամ Խաչատրյանից ենք խոսում, չեն հասկանում, Արամ Ասատրյան են ուզում». Վարդան Մալխասյան

Ազատամարտիկ, «Հայ ազգային կոնգրես» կուսակցության վարչության անդամ Վարդան Մալխասյանը ապրիլի 2-ին ԱԺ ընտրություններում  ռեյտինգային ընտրակարգով իր թեկնածությունն էր առաջադրել Արագածոտնի մարզն ընդգրկող թիվ 7 ընտրատարածքում։ «Չեմ հիշում, չեմ էլ նայել, թե ինչքան ձայն եմ ստացել։ ՀԱԿ-ից վեց թեկնածու էինք առաջադրվել այդ նույն ընտրատարածքում, վեցով միասին երեւի 1700 ձայն ստացած լինենք»։ Նա հիշում է, որ ժամանակին եղել է անազատության մեջ, ոչ մի աշխատանք չէր կատարել որպես ԱԺ պատգամավորի թեկնածու, սակայն 4 հազարից ավելի ձայն էր ստացել այն ժամանակ։ «Ես գիտեմ, որ լավից-վատից ունեմ վարկանիշ, բայց ժողովուրդը, չգիտես ինչու, այս անգամ ձայն չտվեց։ Չգիտեմ, թե ինչ հաշվարկներից ելնելով ձայն չտվեց»,- ասաց նա։ Նկատեցինք, որ միգուցե քիչ ձայներ ստանալու պատճառն այն էր, որ ինքն առաջադրվել էր «Հայ ազգային կոնգրես»-ի՞ց, իսկ ժողովրդի համար ընկալելի չէր ՀԱԿ-ի առաջ քաշած «Խաղաղության պլատֆորմը»։ «Ամեն ինչ հնարավոր է։ «Խաղաղության պլատֆորմը» խորքային ձեւով չհասկացվեց։ Իրենք ամեն ինչի մակերեսին էին նայում ու մտածում, որ հող հանձնողը դավաճան է։ Իսկ ես կարծում եմ, որ որքան արագ լուծենք Լեռնային Ղարաբաղի հիմնախնդիրը, այնքան այն մեզ համար կլինի շահեկան։ Ինչքան ձգձգվի այդ հարցի լուծումը, մենք այնքան թուլացած կլինենք, եւ ադրբեջանցիներն ավելի մեծ պահանջներ կդնեն մեր առջեւ։ Շուրջ 20 տարի այս իշխանությունները ժողովրդին վարժեցրել են փչացածության, կեղծ արժեքների, եւ հիմա քաղում ենք դրա պտուղները։ Արամ Խաչատրյանից ենք խոսում, չեն հասկանում, Արամ Ասատրյան են ուզում»,- ասաց Վարդան Մալխասյանը։ Հոդվածն ամբողջությամբ կարող եք կարդալ «Հրապարակ» թերթի այսօրվա համարում