Համահայկական նվագախմբի առաջին համերգին հնչեց Մանսուրյանի «Պոեմ հաղթանակի» գործը

Նախագահ Սերժ Սարգսյանը և տիկին Ռիտա Սարգսյանն այսօր Ալ. Սպենդիարյանի անվան օպերայի և բալետի ազգային ակադեմիական թատրոնում ներկա են գտնվել «Համահայկական նվագախումբ» նախագծի առաջին համերգին: Այն իրականություն է դարձել Հանրապետության Նախագահի աջակցությամբ և մշակույթի նախարարության նախաձեռնությամբ: Համերգը նվիրված է Հայոց ցեղասպանության զոհերի հիշատակին ու հայ ժողովրդի վերածննդին: Մոտ երկուսուկես ժամ տեւած համերգի ընթացքում աշխարհի 20 երկրների 45 քաղաքներից հավաքված 70 երաժիշտներից կազմված Համահայկական նվագախումբը կատարել է  բացառապես հայ հեղինակների գործեր` Ալեքսանդր Աճեմյանի «Նախերգանքը»,  Էդգար Հովհաննիսյանի «Հուշարձան հերոսներին», Ղազարոս Սարյանի «Հայաստան» սիմֆոնիկ պաննոյի 1-ին մասը` «Գառնին», Բարսեղ Կանաչյանի «Օրորը» (մենակատար` սոպրանո Հասմիկ Պապյան), Ալեքսանդր Հարությունյանի «Ասք հայ ժողովրդի մասին» վոկալ-սիմֆոնիկ պոեմից հատված` «Կրակի բովով», Էդվարդ Միրզոյանի «Շուշանիկ» քնարական պատկերը, Ալան Հովհաննեսի «Սուրբ Գրիգորի աղոթքը» (մենակատար` շեփորահար Դանիել Մելքոնյան), Ավետ Տերտերյանի թիվ 3 սիմֆոնիայի 3-րդ մասը, Առնո Բաբաջանյանի «Վոկալիզը» (մենակատար` սոպրանո Հասմիկ Թորոսյան), Արամ Խաչատրյանի թիվ 2 սիմֆոնիայի 3-րդ մասը, «Սպարտակ» բալետից «Ադաջիոն»,  Ջութակի կոնցերտի 3-րդ մասը (մենակատար` ջութակահար Դիանա Ադամյան), Կոմիտասի «Ծիրանի ծառ, բար մի տա» (մենակատար` Լիպարիտ Ավետիսյան) եւ «Չինար ես»: