Մենք հետեւողական ենք լինելու. Տարոն Մարգարյան

Հայաստանի հանրապետական կուսակցության կողմից Երևանի ավագանու ընտրություններին առաջադրված թեկնածուներն ապրիլի 22-ին հանդիպում ունեցան Արաբկիր վարչական շրջանի  բնակիչների հետ: Հանդիպման ընթացքում ելույթ ունեցավ Երեւանի քաղաքապետի թեկնածու Տարոն Մարգարյանը: Ինչպես ասաց՝ իրենց նախընտրական ծրագրում ներառված են վերջին 4 տարվա ընթացքում երեւանցիների բարձրացրած բոլոր խնդիրները: «5-6 տարի առաջ Երեւանում մանկապարտեզ էր հաճախում ընդամենը 15 հազար երեխա, իսկ այսօր՝ 30 հազար, երբ անվճար են դարձել մանկապարտեզները։ Որ քննադատում են՝ այդ  երկու հազար երեխան չեն կարողանում գնալ մանկապարտեզ, թող հիշեն, որ ընդամենը  6 տարի առաջ 15 հազար երեխա էր գնում»,-ասաց նա: Նրա խոսքով իրենք հետևողական են լինելու. «Մենք հետեւողական ենք լինելու թե՛ օրենսդրական փոփոխությունների, թե՛ համատիրությունների աշխատանքի հարցում: Որտեղ քաղաքացին գոհ չէ, որտեղ բավարար չէ կառավարումը, այնտեղ վերանայում է տեղի ունենալու: Մենք միասին պետք է այդ խնդիրները լուծենք: Վստահեցնում եմ՝ այս ծրագիրը, որը ՀՀԿ թիմն է ներկայացնում,  մեր վաղվա օրվա Երեւանն է»: