Սամվել Բաբայանը կշարունակի մնալ անազատության մեջ.վերաքննիչը մերժեց
Վերաքննիչ քրեական դատարանը այսօր մերժեց ԼՂՀ պաշտպանության բանակի նախկին հրամանատար Սամվել Բաբայանի կալանքի վերաբերյալ բողոքը, և վերջինս կմնա կալանքի տակ։ Այդ մասին քիչ առաջ հայտարարեց Բաբայանի փաստաբան Ավետիս Քալաշյանը։ Ավետիս Քալաշյանը լրագրողների հետ զրույցում նշեց, որ նյութերին ծանոթանալուց հետո պատրաստվում է դիմել Վճռաբեկ դատարան. եթե Վճռաբեկ դատարանը եւս մերժի, նա պատրաստվում է դիմել նաեւ Մարդու իրավունքների եվրոպական դատարան: «Ինձ համար այս որոշումը սպասելի էր, անակնկալ չէր: Դատարանն այնքան էլ ազատ չէր, կաշկանդված էր»,-ասաց նա: Նշենք , որ Սամվել Բաբայանը որոշման հրապարակմանը ներկա չի եղել: Հիշեցնենք՝ Հայաստան Վրաստանից «Իգլա» տեսակի զենիթա-հրթիռային համալիր տեղափոխելու փաստի առթիվ ԱԱԾ-ում հարուցված քրեական գործի շրջանակներում կալանավորվել էին երեք անձ, որոնցից հայտնի են միայն երկուսը՝ Սամվել Բաբայանը և նրա մարտական ընկեր Սանասար Գաբրիելյանը:
Հետևեք մեզ Viber-ում
