Հյուսիսային Կորեան պետք է ավելի շատ արբանյակներ արձակի

Հյուսիսային Կորեայի առաջնորդ Կիմ Չեն Ինը հրթիռակրի արձակմանը մասնակցողների պատվին հյուրասիրության ընթացքում հայտարարել է ավելի շատ աշխատանքային արբանյակների արձակման անհրաժեշտության մասին։ Այս մասին հայտնում է Հյուսիսային Կորեայի Կենտրոնական հեռագրային գործակալությունը։ «Տիեզերական սարքի հաջող արձակումը՝ ի շահ հեղափոխության և անկախության, վստահություն է ներշնչել հյուսիսկորեացի ժողովրդին և հարված հասցրել նրա թշնամիներին»,- նշել է Հյուսիսային Կորեայի առաջնորդը։ Հյուսիսային Կորեան պնդում է, որ փորձարկումներն անցել են իր տիեզերական ծրագրի շրջանակում, սակայն միջազգային հանրությունը կասկածում է Փխենյանին միջուկային զենքի փոխադրման միջոց մշակելու համար։