Ով ով՝ Հովիկ Աբրահամյանը լավ գիտի
Նախկին վարչապետ Հովիկ Աբրահամյանն այսօր այցելել էր Կոմիտասի անվան Պանթեոն՝ հարգանքի տուրք մատուցելու Կարեն Դեմիրճյանի հիշատակին: Այսօր՝ ապրիլի 17-ին լրանում է քաղաքական և պետական գործիչ, Հայաստանի կոմունիստական կուսակցության առաջին քարտուղար, ՀՀ Ազգային ժողովի նախագահ, Հայաստանի ազգային հերոս Կարեն Դեմիրճյանի 85-ամյակը: Նախկին վարչապետը բավական հաշվենկատ պատասխաններ է տվել լրագրողներին ներքին քաղաքական ու տնտեսական հարցերին: «Դրական փոփոխություններ եմ տեսնում, և ես կարծում եմ, որ այս ընտրությունների արդյունքում նոր ձևավորվող կառավարությունը կփորձի ամեն ինչ անել, որպեսզի նպաստի ՀՀ զարգացմանը: Ժամանակ է պետք, որպեսզի արդյունքները լինեն տեսանելի, և ես կարծում եմ, որ այդ ժամանակը գալու է»,- ասել է նա գնահատելով Կարեն Կարապետյանի յոթամսյա գործունեությունը։ Հարցին, թե հետագայում ինչ գործունեություն է ծավալելու, եւ արդյոք Սերժ Սարգսյանը նրան որեւէ պաշտոն խոստացել է հարցին, Հ. Աբրահամյանը պատասխանեց՝ ժամանակը ցույց կտա, և հավելեց, որ դեռևս ոչ ոք ոչ մի խոստում չի տվել: Հովիկ Աբվրահամյանի դեպքում, ով ամենալավը գիտի Սերժ Սարգսյանի «ձեռագիրը», այլ պատասխաններ ակնկալելը խելամտություն չէր լինի։ Տարբեր պատճառներով ու հանգամանքներում իշխանության հետ կապերը ժամանակավոր կամ ընդմիշտ խզած յուրայինների վերաբերյալ Սերժ Սարգսյանը յուրօրինակ մոտեցում ունի։ Որպես կանոն հախուռն ու կտրուկ որոշումներ չի կայացնում ՝ թողնելով նման գործիքակազմը խիստ ծայրահեղ պահերին։ Հիմնականում նա չի շտապում, պահելով անորոշությունը, նա տվյալ սուբյեկտի հարցը թողնում է տարածությանն ու ժամանակին։ Այսպիսով՝ շախմատային քայլերով դանդաղ շտապող Սերժ Սարգսյանը տվյալ անձին մղում է հոգեբանական ու նյարդերի կռվի, քանի որ որեւէ հստակեցման չի տանում, լավագույն դեպքում տվյալ իրավիճակում իշխանության կոնֆիգորացիաներից դուրս եկող կամ ինչ-ինչ պայմաններում դուրս մղվող անձին կարող է խորհուրդ տալ՝ գնա-հանգստացիր, հետո կորոշենք, իսկ առհասարակ պահում է սրտմաշուք լռություն։ Տվյալ պարագայում հասկանալու տեսադաշտում գտնվող անձի գործողությունները, որոնք կարող են տարբեր լինել։ Որեւէ մեկը թուլացած կսկսի բանակցել այլ ճամբարների հետ, կամ սարդոստայն կհյուսի իշխանության դեմ, միգուցե զերծ չմնան էքսցենտրիկ հայտարարություններից եւ այլն։ Այս առումով լարված ու պատասխանատու ժամանակներ են երկու կողմերի համար՝ եւ Սերժ Սարգսյանի, եւ Հովիկ Աբրահամյանի։ Եթե դիտարկենք Սերժ Սարգսյանի՝ Հովիկ Աբրահամյանի նկատմամբ վերաբերմունքը, վերջինի ՀՀԿ-ից դուրս գալուց հետո, ապա դժվար է ասել, որ թե լուրջ հարվածներ են եղել, ամեն դեպքում Աբրահամյանն ու իր ընտանքիը շարունակում են առանց խոչընդոտ գործունեությունը, իսկ մենք տեսել ենք, թե ինչ կարող է պատահել նրանց հետ, որոնք խզել են կապը իշխանության հետ, կամ գնացել են առճակատման։ Եւ քանի որ ով, եթե ոչ Հովիկ Աբրահամյանը, ով փայլուն գիտի Սերժ Սարգսյանին, չպետք է պահեր ներքին հավասարակշռությունը իրավիճակի նկատմամբ, ընտրությունների ելքի գնահատականի՝ ի դեմս որդու ընտրություններին մասնակցության եւ մանդատ վերցնելու վերաբերյալ, նախագահի նկատմամբ եւ, որքան էլ տարօրինակ թվա՝ վարչապետի։ Գործադիրի նախկին ղեկավարի համար ակնհայտ է, որ ինքը Սերժ Սարգսյանի միջոցով քաղաքական պլաններ գծելու այլընտրանք չունի, որովհետեւ Կարեն եւ Սամվել Կարապետյանները ցույց տվեցին, որ թիմ են ձեւավորում եւ իրենց խաղն են տանում ու հարմար պահի կարող են «քցել» Աբրահամյանին , Աբրահամյանի քաղաքական հենման հաջորդ կետը Գագիկ Ծառուկյանն է, որն էլ իր հերթին ցույց տվեց, որ որեւէ պարագայում չի գնա սրացման, ուստի Հովկ Աբրահամյանին մնում է սեփական նյարդերը ամրացնել, հատկապես, որ Սարգսյանը իր բիզնեսների նկատմամբ դաժանություն չի դրսեւորել, թեպետ կարող էր, վարչապետի նկատմամբ էլ հաշվենկատ սառնասրտություն դրսեւորել՝ զերծ մնալով ավելորդ գնահատականներից։ Թեպետ լինելով վարչապետ նա լավագույնս կանխատեսում է գործողի տապալումը, քանզի խոստացած ներդրումները ռեալ չեն, հասկանալի է, առաջին վեց ամիսն արդեն ետեւում է, երբ կարող ես հանրությանը սպասումի մեջ պահել՝ հստակ խոստումներով, բայց դրանից հետո պարտավոր ես արդյունքներ ցույց տալ ։ Ինչ խոսք՝ հիմա մի փոքր նպաստավոր պայման է ստեղծվել ընտրությունների համար բերված փողն է մտել շրջանառության մեջ, բայց իհարկե, դրա մարման ժամանակը գալու է,։ Այ հենց այդ ժամանակի վրա է Աբրահամյանի հույսն ու հաշվարկը, որ գործող վարչապետը հաջողության չի հասնելու, իսկ ինքը մտածում է իրեն ճիշտ պահելու դեպքում իր ժամանակն է գալու, սլաքն աշխատելու է իր օգտին։ Անի Սահակյան
Հետևեք մեզ Viber-ում
