«Ռուբեն Ցոլակովիչն իմ լավ ընկեր-բարեկամն է». Փոստանջյանը՝ ռուսաստանաբնակ գործարարի ֆինանսավորման մասին
«Երկիր ծիրանի» կուսակցության առաջնորդ Զարուհի Փոստանջյանը «Ազատության» հետ զրույցում հերքել է, թե ռուսաստանաբնակ գործարար, «Ռուցոգ ինվեստ» ընկերության նախագահ Ռուբեն Գրիգորյանն է ֆինասնավորում իր ղեկավարած «Երկիր ծիրանի» կուսակցությունը: Մամուլն այսօր գրել է, թե Փոստանջյանը միլիարդների կարողություն ունեցող գործարարի հետ համագործակցում է դեռ անցած տարվանից: Նշենք, որ «Ռուցոգ ինվեստ»-ը Ռուսաստանում զբաղվում է բնակելի և կոմերցիոն շենքերի շինարարությամբ:
– Նախ պետք է ասեմ, որ, իհարկե, Ռուբեն Ցոլակովիչն իմ լավ ընկեր-բարեկամն է, և հայ ժողովրդի լավագույն ներկայացուցիչներից մեկն է, ով մեծ մտավորական է նաև։ Ոչ միայն գործարար է, այլ նաև ղեկավարում է և ստեղծել է, հիմնադրել է թանգարան Մոսկվայում, և իմ ընկերն է։ Բայց, ինչ վերաբերում է ֆինանսավորմանը, ապա կարող եմ ասել, որ մենք աջակցություն կարող ենք ստանալ ցանկացած հայից, որովհետև մեզ ցանկանում են աջակցել բազմահազար հայեր, և այդ մասին նրանք նաև հայտնում են մեզ հենց կուսակցության հիմնադրման օրվանից՝ աշխարհի տարբեր ծայրերից, այնպես որ, Ռուբեն Ցոլակովիչն իմ լավ ընկերն է, բայց ֆինանսական տեսանկյունից մենք կարող ենք աջակցություն ակնկալել և ստանալ բազմաթիվ հայերից՝ աշխարհի տարբեր ծայրերից։ – Բայց նրանից նույնպե՞ս ֆինանսական աջակցություն ստացել եք։ – Ո՛չ, նրանից մենք ֆինանսական աջակցություն չենք ստացել, բայց ինքն իմ լավագույն ընկերներից մեկն է։ – Նա ինչպիսի՞ հարաբերությունների մեջ է Հայաստանի իշխանությունների հետ։ Նորից ընդդիմադիր հայացքներ ունի՞ ինչպես Դուք, նա կիսո՞ւմ է Ձեր ընդդիմադիր հայացքները։ Որովհետև սովորաբար ռուսաստանաբնակ գործարարները իշխանամերձ են լինում։ – Կարծում եմ, որ Դուք տեղեկացված եք, որ նրա կողմից հրապարակվեց մի հայտարարություն, որը վերաբերվում էր Հայաստանի գործող իշխանություններին։ Իհարկե նա այստեղ նաև իր բարեգործությունն է իրականացրել, բայց միայն բարեգործություններով հնարավոր չէ երկիրը ուղղել կամ շտկել, կամ տնտեսական վիճակը բարելավել։ Նա հասկանում է, որ քաղաքական համակարգը պետք է փոխվի, և այդ մասին նա նաև հրապարակավ ելույթ է ունեցել։ – Նա որևէ առումով կապ չունի՞ «Երկիր ծիրանի» կուսակցության հետ՝ ոչ միայն ֆինանսական, այլ նաև գաղափարական։ – Նա լավագույն ընկերն է, կարծում եմ նաև իմ գաղափարական հայացքները կկիսի, որովհետև մենք իր հետ ընկերներ ենք և խոսել ենք այս ամենի մասին։ – Տիկին Փոստանջյան, պարզ է բոլորին է, որ այսօր քաղաքականությունը, կուսակցություն պահելը բավականին լուջ ֆինանսներ է պահանջում, և նաև առաջիկայում ավագանու ընտրություններն են, նորից բավական գումարներ անհրաժեշտ կլինեն, որտեղի՞ց եք հայթայթում այդ գումարները։ – Համայն հայությունը հետաքրքրված է՝ ինչ է տեղի ունենում Հայաստանի Հանրապետությունում, ինչ քաղաքական իրադարձություններ են տեղի ունենում, և երբ մենք ներկայացրեցինք մեր քաղաքական հայտը, ապա աջակցության վերաբերյալ հայտերն, իրենց կողմից հայտարարությունները և կապը բազմաթիվ է, նրանք ցանկանում են մեզ աջակցել և պատրաստ են այդ աջակցությունը ցուցաբերել։ Ես ստանում եմ տարբեր հեռախոսազանգեր և նամակներ, մեր հայրենակիցները իրոք սրտացավ են մեր հայրենիքով և հասկանում են՝ եթե այս պահին հայրենիքին սատար չկանգնեն՝ հենց քաղաքական տեսանկյունից, քաղաքական գործընթացների մեջ չներգրավվեն, ապա մենք հնարավոր է նաև կորցնենք մեր հայրենիքը։ Ամբողջությամբ՝ սկզբնաղբյուր կայքում:
Հետևեք մեզ Viber-ում
