Ցավալի մահ էր. ո՞վ է դիպուկահարի կրակոցից զոհված Հակոբը

«Հակոբը կռված տղա էր, պատերազմի մասնակից, բայց վատ էին ապրում, ինքը հովվություն էր անում, չնայած տարիքը մեծ չէր: Ջահել էր` 54 տարեկան: Լավ է գոնե պսակված երեխեք ուներ, գոնե խիղճը հանգիստ էր, չնայած պատերազմը հոգում մեջ էր...»,-Հայելի .am-ի թղթակցի հետ զրույցում ասաց ԼՂՀ Մարտունու շրջանի Վազգենաշեն գյուղի համայնքապետ Անդրանիկ Բաբայանը: Գյուղապետի փոխանցմամբ` Հակոբ Համբարձումյանը Վազգենաշենում կնոջ հետ էր բնակվում, երկու դուստրերն ամուսնացած են:Գյուղապետը փաստեց, որ մարդիկ ապրում էին հանգիստ ու իրենց առօրյան դասավորում էին աշխատանքի ու նվիրումի միջոցով: «Կինն էլ օգնում էր իրեն, ոչխար էին պահում: Ազատամարտիկների միության անդամ, վետերան էր»,-ընդգծեց Բաբայանը: Գյուղապետը փաստեց, որ բոլորի համար ցավալի է այս մահը: Բաբայանը նկատեց, որ ազատամարտիկի համար ամեն դեպքում ցավալի է` դավադիր գնդակից խոցվելը: Հիշեցնենք, որ փետրվարի 11-ին՝ ժամը 16:00-ի սահմանում, հակառակորդի կողմից «ԻՍՏԻԳԼԱԼ» տեսակի դիպուկահար հրացանից արձակված կրակոցից մահացու հրազենային վիրավորում է ստացել քաղաքացիական անձ, ԼՂՀ Մարտունու շրջանի Վազգենաշեն գյուղի բնակիչ, հովիվ, 1962թ. ծնված Հակոբ Համբարձումյանը: Դեպքի մանրամասները պարզելու համար կատարվում է քննություն: Աստղիկ Ավագյան