Ավտովթար Լոռու մարզում

Ապրիլի 17-ին, ավտովթար է տեղի ունեցել Լոռու մարզում։ Ժամը 19։30-ի սահմաններում Լոռու մարզի Շնող գյուղի բնակիչ՝ 42-ամյա Արա Բաբայանը Աղթալա քաղաքի վարչական տարածքում կամրջի հարևանությամբ կորցնելով իր վարած Volkswagen Passat մակնիշի 34 RS 096 համարանիշի ավտոմեքենայի կառավարումը՝ հարվածել է ճամփեզրին գտնվող գազատար խողովակին, այնուհետև՝ էլեկտրասյանը, և մոտ 20 մետր առաջ ընթանալով՝ գլխիվայր շրջվելով հայտնվել է ձորակում։ Ինչպես հայտնում է ֆոտոլրագրող Գագիկ Շամշյանը, վթարի հետևանքով վարորդ Ա. Բաբայանի ուղևոր՝ նույն գյուղի բնակիչ՝ 22-ամյա Հայկ Բոշյանը բուժօգնություն ստանալու նպատակով դիմել է Ալավերդու բժշկական կենտրոն, որտեղ ստանալով առաջին օգնությունը՝ հեռացել է։ Դեպքի վայր են ժամանել Ճանապարհային ոստիկանության 2-րդ սպայական գումարտակի 5-րդ վաշտի 2-րդ դասակի աշխատակիցները՝ դասակի հրամանատար Սմբատ Նորեկյանի գխավորությամբ։ Ժամանել է նաև ոստիկանության Թումանյանի բաժնի օպերատիվ խումբը՝ բաժնի պետ Վահագն Մոսինյանի գլխավորությամբ։ Վթարի մասին տեղեկությունը փոխանցվել է Հայաստանի քննչական կոմիտեի Լոռու մարզային քննչական վարչության Թումանյանի քննչական բաժին, որտեղից դեպքի վայր է ժամանել ավագ քննիչ Արարատ Ուլիխանյանը, ում կողմից փաստի առթիվ նյութեր են նախապատրաստվում։ Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: