«Թուրքիան չլուծված խնդիրներ ունի». Սարգիս Գրիգորյան
Այսօր Հայելի ակումբում արևելագետ Սարգիս Գրիգորյանը նշեց, որ այն կարծիքին է, որ Թուրքիայի Սահմանադրական ընտրություններից հետո կտրուկ փոփոխություններ չի կրի՝ Թուրքիա-Սիրիա-Ռուսաստան հարաբերություններում: Բայց որոշակի շեշտադրումների փոփոխություն, դիրքորոշումների հստակեցում անշուշտ կնկատվի, քանի որ մինչ սահմանադրական փոփոխությունները, այդ մասին հայտարարում էին թուրքական իշխանությունները: «Սահմանադրական հանրաքվեն Էրդողանի հաղթանակի իրավական ամրագրումն էր, որն իրականացվեց հեղաշրջման չստացված փորձից հետո։ Այս ամբողջ համապատկերի համատեքստում մենք պետք է խոսենք ավելի հավակնոտ և ավելի անկանխատեսելի Թուրքիայի մասին՝ ոչ միայն Թուրքիայի ներսում, այլ նաև տարածաշրջանում»,- ասաց նա: Նրա խոսքով Թուրքիան չի կարող նաև անտարբեր մնալ Սիրիայում կատարվողի հանդեպ. «Հաղթանակած ռեսուրսով Էրդողանը չի կարող անտարբեր մնալ հենց Սիրիայում եւ Իրաքում քրդերի հետ կապված գործողություններին»: Այնուհետև նշեց, որ Թուրքիան չի գնա ԱՄՆ-ի և ՌԴ-ի հետ հարաբերություններում կտրուկ փոփոխությունների, թեև որոշակի հստակություններ կլինեն: «Թուրքիան չլուծված խնդիրներ ունի իր ներսում և հարակից տարածաշրջանում, իսկ ԱՄՆ-ի կամ ՌԴ-ի հետ հարաբերությունների վատթարացումը կաշխատի ի վնաս իր ծրագրերի»,- ընդգծեց նա:
Հետևեք մեզ Viber-ում
