Ի՞նչ նպատակ ուներ Դեմիրջի ընտանիքի սպանությունը. վախ պոլսահայոց շրջանում

« Թուրք հասարակության մեջ այսպիսի մի շղարշ կա, եթե հայ է, ուրեմն` ռուսների մարդն է, եթե հայ է, անպայման ռուսամետ կլինի, որովհետև Հայաստանն ինքնին ռուսամետ է: Ուստի` ներկա կոնֆլիկտային իրավիճակը նպաստավոր չէ հայության համար»,- Հենարան մամուլի ակումբում հրավիրված ասուլիսի ժամանակ հայտարարեց տարածաշրջանային հարցերով փորձագետ-վերլուծաբան, պոլսահայ Սարգիս Հացպանյանն: «Վերջին մի քանի ամիսների ընթացքում հետևել եմ ու նկատել, որ պոլսահայ ակտիվ հատվածը, հատկապես երիտասարդների ակտիվ մասը մի քիչ զուսպ է պահում իրեն: Մտավախություն ունեն, որ եթե ինչ-որ բան անեն, նրանց անմիջապես կարող են ասել, որ Ռուսաստանի գործակալներ են»,- նկատեց Սարգիս Հացպանյանը: «Ցանկացած կոնֆլիկտում հայությանը Թուրքիայում դիտել են որպես ռուսամետ: Երբ ցանկանում են հային ինչ-որ ձևով պախարակել կամ վիրավորել, չեն ասում` գնա Երևան, ասում են` գնա Մոսկվա»,- ասաց նա: Հացպանյանի փոխանցմամբ՝ Թուրքիայում հայ համայնքը վախեցած վիճակում է: Անդրադառնալով  փետրվարի 6-ին հայազգի Հակոբ Յաքուփ Դեմիրջիի և Սեդա Աիդա Դեմիրջիի տան վրա հարձակումը, ինչպես նաև ծեր ամուսինների խոշտանգումը հանցագործների կողմից, որի հետևանքով էլ Հակոբ Յաքուփ Դեմիրջին մահացել էր. «Վախենում են նման հարձակման ենթարկվել: Իրենք՝ իրենց զուսպ են պահում և ասում են՝ այ մարդ այս անգամ էլ մեր գլխին է գալու: Վստահ եմ, որ ծերունիների ընտանիքի վրա հարձակումը ուղղորդված էր: Պարզ է, որ 86 տարեկան մարդը երեք երիտասարդ տղամարդուն չէր դիմադրի:Հույս ունեմ, որ Դեմիրջին ընտանիքի թաղման օրը հայությունը կհամախմբվի»,-նշեց Հացպանյանը և հավելեց, որ այս  դեպքից հետո հատկապես հայերը սկսել են հեռանալ Թուրքիայից.«Այս վախվորած մթնոլորտում ի՞նչ պետք է լինի, ստիպված` ուզեն-չուզեն՝ պետք է գնան, քանի որ նաև եկեղեցին չի սաստում նման դեպքերը: Մարդիկ վախենում են, որ իրենց հետ կպատահի նույնը և մտածում են, որ Թուրքիայում պատանդի կարգավիճակով են ապրում»: Աստղիկ Ավագյան