Խոշոր վթար Արարատի մարզում. ավտոմեքենան վերածվել է մոխրակույտի, վարորդը տեղափոխվել է հիվանդանոց

Այսօր՝ ապրիլի 17-ին, խոշոր ավտովթար-հրդեհ է տեղի ունեցել Արարատի մարզում։ Ժամը 05։50-ի սահմաններում Գեղարքունիքի մարզի Ծովազարդ գյուղի բնակիչ՝ 25-ամյա Կարեն Առաքելյանը իր վարած Volkswagen մակնիշի 34 ZC 877 համարանիշի ավտոմեքենայով Երևան-Երասխավան ավտոճանապարհի 11-րդ կմ հատվածում՝ Մասիս քաղաքի վարչական տարածքում, բախվել է Հյուսիս-Հարավ նորակառույց ճանապարհին տեղադրված բետոնե արգելապատնեշին և մոտ 80 մետր առաջ ընթանալով՝ դուրս է եկել ճանապարհի երթևեկելի գոտուց և հայտնվել դաշտում։ Ինչպես դեպքի վայրից հայտնում է ֆոտոլրագրող Գագիկ Շամշյանը, բախման հետևանքով ավտոմեքենայում հրդեհ է բռնկվել, իսկ վարորդը՝ Կ. Առաքելյանը, մարմնական վնասվածքներով, այդ թվում՝ այրվածքներով, տեղափոխվել է Մասիսի բժշկական կենտրոն։ Նրան առաջինը օգնության են հասել վթարի վայրի հարևանությամբ գործող գազալցակայանի աշխատակիցները։ Ֆոտոլրագրողը հայտնում է՝ հարվածն այնքան ուժգին է եղել բետոնե արգելապատնեշին, որ այն կոտրել և մոտ 10 մետր շպրտել է, իսկ մեքենան էլ մոտ 70 մետր հետքագծով առաջ է ընթացել։ Դեպքի վայր են ժամանել Ճանապարհային ոստիկանության 2-րդ սպայական գումարտակի 1-ին վաշտի 2-րդ դասակի աշխատակիցները՝ դասակի հրամանատար Սանասար Հարությունյանի գլխավորությամբ։ Ժամանել են նաև Արտակարգ իրավիճակների նախարարության Փրկարար ծառայության Մասիսի թիվ 25 հրշեջ-փրկարարական ջոկատը՝ 1 մարտական հաշվարկով՝ հերթափոխի պետ Հովհաննես Թովմասյանի գլխավորությամբ։ Վթարի մասին ՃՈ օպերատիվ կառավարման կենտրոնի պատասխանատու հերթապահ Կարեն Հովակիմյնաը տեղեկությունը փոխանցել է ոստիկանության Մասիսի բաժին, որտեղից ժամանել է օպերատիվ խումբը՝ քրեական հետախուզության բաժանմունքի օպերլիազոր Հայկ Ջամալյանի գլխավորությամբ։ Փաստի առթիվ ՃՈ 2-րդ սպայական գումարտակի 1-ին վաշտի հետաքննիչ Էդուարդ Շախսուվարյանի կողմից նյութեր են նախապատրաստվում։ Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: Լուսանկարները և տեսանյութը՝ Գագիկ Շամշյանի